Zeiruangah USA Ah Covid-19 Zawtnak In Kan Zawt Tlukin Thihlohnak Kan Tong Tuk Lo ?

Catialtu: Salai Z T Lian 

(1) Pathian hupphennak le zangfahnak ruang ah asi.

(2) USA um Chin miphun hi kum 65 cung milu hi an tlawm tuk.

(3) Nai le tutan Covid-19 zawtnak in azaw mi hna tam-u hi an ngandamnak a thami an tam , cun kum 55 tang an tam caah asi.

(4) An mah le mah zohkhen an thiam le ngandamnak lei nih zulhding tete an timi an zulh thiam caah asi.

Kan tuah a herh rihmi pawl

(1) Covid-19 zawtnak in azawmi an um rih, pakhat le pakhat zeimawzat ichawnh asi rih caah pakhat le pakhat ilenkai tuk rih lo ding.

(2) A voihnihnak pulrai hi a um kho men tiin thawngpang a um caah tuan deuh bantukin daitlang lo ding.

(3) Chin miphun chungah ngandamnak lei a tha lomi le kum upa hna hi ahleice in kilven thiam rih ding. Avoihnihnak pulrai nih a kan den sual than zongah an luatnak caah biatak tein thlacam le kilven thiam an hau.

(4) Kut itawl lengmang ding, mibu lakah umkal tikah hmaihuh ihuh ding kan herh rih.

A donghnak ah tial ka duhmi cu nizan ah covid-19 zawtnak in azaw i a damka nu nih a ka chimhmi bia hi asi. “ Kawlram ah Malaria zawtnak , USA ah flu zawtnak tibantukin zawtnak zeimawzat in ka zaw bal cang, nain tutan Covid-19 zawtnak nih a ka den cu a celh bak ka celh lo, a pin taktak khi asi, ka thi cang ko lai tiin ka ruah nain Pathian dawtnak thawngin ka dam than”.

Hi Covid-19 zawtnak hi capo men asi lo, cheukhat caah cun taksa fah men hrawng lawng zong asi kho men ko nain cheukhat caah cun thihnak le nunnak ramri ah an phan kho ve. Cucaah hi covid-19 zawtnak hi daitlang awk a tha bak lomi asi. Kawl holh in cun ahtinte awk a tha lo.

 

 165 total views,  1 views today

This function has been disabled for Chin 11 News.