ZEIBANTUK MINUNG DAH KAN THIM HNA LAI

(Na reel huamphun asi maw?)

ZEIBANTUK MINUNG DAH KAN THIM HNA LAI

==========================

By Siang Kung Tz

Nan hngalh cio btk.in, Democracy ram ahcun kum 4/5 danah mipi aiawh tuding thimnak (Election) ngeih zungzal asi. Cu cu, democracy uknak kha uknak dang he fianghlang ngai i an i dannak pakhat asi. Thimnak hi a tam ngai², a um caamci tikhawh asi. General Election, Mid-term Election, By-election tbk. hna hi atu le atu ngeih lengmangmi cu an si. Cucaahcun, democracy uknak cu aman a faakmi uknak asi tertu lakah thimnak (election) hi pakhatah ai telve. Ram uknak he aa tlaimi ah mizapi kan i tel khawhnak lam asi caah, democracy tungsuutpi cu Myanmar ram nih uknak ah aa tlaih hnu ahcun, a caan tete ah thimnak kan ngei lengmang cang lai. Zeibantuk party dah kan ram cozah tlaitu dingah aṭhabik lai i, zeibantuk minung dah kan aiawh dingah kan duhbik/zumhbik ti zong tuaktaan thiam a hauko cang lai. Kan aiawh caah thim dingmi minung kong ceih hi ahar tukmi asi pinah pakhat le pakhat duhning zong ailo lailo. Cucaah, keimah pumpaak duhning / ruahning lawng bi tein ka rak ṭial lai. Sawhchihmi (point) paruk in siphawtko rih seh.

  1. Party Zohding:

Party tampi kalning (multi-party system) a zulmi ram ah thim dingmi party hngalh hi a biapi ngaiko lai. Party cheukhat cu ram pumpi caah dirh ansi i, party zeimawzat cu State/Region pakhat ca lawng zohin dirh ansi ve. Ram pumpi caah uknak lei tuaktaan caan maw asi, State / Region caah dah? tikha ahmun le acaan zohin ruahthiam aherh ngai² ko lai. State/Region ram uknak kongkau hi ram pumpi zawnruahnak in chiahta caan asi maw/silo? Union party chung um caan maw asi, Regional party chung um caan dah? tizong khua khingkhak tein cuaithlai thiam a hauko rih lai.

  1. Policy Theihding:

Party hna nih aa dangmi policy ngeih cio asi. Cucu, party pakhat le pakhat an i dannak a langhtertu pakhatnak asi. An Manifesto (Tuah dingin biakam nak) chungah aa khatmi an um zongah, number an thlaihning le hmun an peekning aa khat hrim² lailo. Chim duhmi cu, uar khunmi le an papeekning aalo lailo tinak asi. Bianaah; NLD party nih phunghrampi remh le remdaihnak an i hmaithlak (cawisaan) lioah CNLD party nih Federal kong le mahte khuakhan lairelnak lei kha papeek arak sive. Hihi abiapit tuk caah, mikip nih party pakhat cio i an policy le an manifesto hi hngal kho dingin reel i zuam hna usih. Khakha ka i fian hnuah anih hi cubantuk policy i tlaih buin aa cuhmi asi i, anih hi kha bantuk manifesto i ken buin aa cuhmi asi tikha kan theih lai i, thimding le thimloding zong kan i fiangko lai ti ka zumh.

  1. An Tuanbia Hlathlaai:

An tuanbia hlathlaai tikah a ṭhadeuh lai tiah la ruahmi cu; pi le pu, nu le pa hringsortu nak hmanh in, mipi aiawh dingah cuh aa timmi i an pumpaak tuanbia hi asideuh awk asi tiah ka ruah. Rian hmedeuh aṭuanmi ansiah siseh, riansang deuh arak ṭuanmi ansiah siseh, rian ateimi ansi maw / silo, zumh awktlakin rian a ṭuanmi asi maw/silo, cozah le a rianṭuanṭi hawi mithmai azoh maw/zohlo, ading-ei tukmi asi maw/silo, i sumkhawhnak a ngei i, mah le mah aa ukkhomi (aa tei mi) asi maw/silo, chimhhrin i, ruahnak peek khawhding minung asi maw/silo, mah karkalak huih i a ummi le mi duhfaak phun asi maw/silo, tbk. vialte pinah a biakmi a Pathian aṭih maw/ṭihlo tihi atuanbia hlathlaainak tahfung caah a tlangpiin hmankhawh an siko lai. “Zeibantuk minung dah kan si ti akan hngal cemtu hna cu, kanmah naih bikah a ummi minung hna hi ansi” an rak ti. Cucaah, kan aiawh caah aa cuh dingmi minung an chiat/an ṭhat le an konglam theih kan duh ahcun, an innpa chakthlang, an hoi le, an sang le an khuami hna sinin an tuanbia hlathlaiah a ṭhabikko lai.

  1. Fimthiamnak Leiah:

An cacawn saanning le an degree kong hi cu chim kai tim lemlo. Kan aiawh dingah kan duh bikmi minung cu kan herhmi le kan chambaumi a hngal i, cuban tuk kan ngeih khawhnak dingah lam akawl thiammi hi an si-awk asi tiah ka ruah. Khua le ram sining fiangte a hngal i, kha he khan aa tlakningin zeibantuk Project le Infrastructure dah tuah ding asi ti ruahnak a chuahpi khotu hi kei cu ka aiawh dingah ka duhbikko hna. Nang zong na sive lai ti ka zumh. Cupinah, cozah riansang aṭuanmi (Bureaucrats) pawl rianṭuanning le rian kalphung a hngal dih i, an dihlonak hlingcoih i a coih khotu le a chimhring ngamtu sikho hna selaw ka duhfawn rih.

  1. Ngandamnak Leiah:

Pathian sinin a cohlanmi ngandamnak ṭha a ngeimi sikho selaw chim hauloin mizapi nih kan duh dihko lai ti ka zumh. Ngandamnak ti tikah, pumsa lawng siloin, lungthin, ruahnak le thlarau ngandamnak zong telh chih ansi. A ngandammi pumsa chungah a ngandammi lungthin/ruahnak (A sound body in a sound mind) tiphun kha chim duh mi cu asi. Na rak theihve ko lai dah ka ti. Donald Trump president ai cuh lioah opposition party asimi Democrat pawl nih pumsa siloin, ruahnak lei ngandamlonak ngeiah anrak puh. Mentally, he is unfit for serving the president of USA. tiin anrak ti. Ngandamnak tlamtling a ngeimi minung hi mipi aiawhtu caah an biapi tak² ko lai. Cucaahcun, kha bantuk ngandamnak ṭha ngeikho dingin tuahsernak he aa zuam zungzalmi sikho selaw kei ka saduhtah cu asi.

  1. Ram Dawtnak Leiah:

Ramkhel caṭial Boron chim mi ka lungah ahung chuak. “A ram a dawlomi nih zeihmanh a daw lailo” (He who not love his country loves nothing) tihi asi. Ram chungah minung, saram, thingram tbk.in nunnak ngei an um lioah, vawlei le rili tangah a ummi nunnak ngeilo zong an um ve rih. Ramchung minung cungah dawtnak ngeih hi abiapit btk.in, ram nih rosung arak ngeihmi vawlei cung/tang thil cung zong ah dawtnak ngeih hi abiapi ngai² ko lai. Mahhi thil pahnih cungah dawtnak ngeih hi ram dawtnak tling asi tiah kei cu ka ruah. Nan hmuh ton ciomi asi. Dawtnak lam cu ngeichin luaimai lam siloin, zawrnak lam asi. Thaunak lam siloin, dernak lam asi. Miaknak lam siloin, sunghnak lam asi tihi aa fiangmi sikho selaw, ka aiawh dingin thim ka duhmi cu asi. A tawinak bikin chimko usih kan ti ahcun, ziknawh, eihmuarnak le mipi le ram tangka fir duhnak lungthin aput tertu a hrampi cu; “ram dawtnak tak² kan ngeihlo ruangah asiko”. Nihin nitiang a ram adaw tak² mi eihmuarnak a tuahmi ka thei rih hnalo i, ram dawtnak a ngeilomi, eihmuarnak a tuahlomi zong ka thei fawn rih hnalo. Hihi thimfung kan khiah laiah philhlo tein ahmasa ah ruat cio hna usih!

(Careeltu nan cungah kai lawm.)

×××××××××××××××××××××××××××

 380 total views,  1 views today

This function has been disabled for Chin 11 News.