ZEI POH HI ANMAH LE CAAN CIO I CHIM LE REL HI A ṬHA

US Senate ah Republicans nih maw an tei lai siloah Democrats nih dah an tei lai ti hi Biden maw President si lai Trump dah si ṭhan lai ti tluk tein a biapi mi si.

US Senate ah State cio nih minung 2 cio thlahnak nawl an ngei i Senator hi an dihlak ah 100 an si. Kum 6 dan ah zatceo hrawng hi thim ṭhan lengmang an si. Tu kum ah hin Senator 35 thim an hau i atu tiang a fiang cangmi ah Democrats nih seat 47 an ngeih, Republicans nih seat 48, Independent in seat 1 an ngeih ve. Seat 51 angeimi poh nih Senate hi uk (control) ding a si.

Alaska, N. Carolina, le Georgia senate thimnak result hi hngah rih mi a si. Alaska le N. Carolina ah cun Republicans nih tei rih ding ah zumh a si i an tei rih ahcun 48-50 a si lai. Georgia hi senate 2 in thim ding an si nain Georgia state phunghram ning in 50% naak tam a hmumi an um lo ahcun teitu (winner) um lo ah ruah a si.

Georgia senate election vote an rel cangmi ah 50% naak tam a hmumi an um lo. Cucaah, January 5, 2021 ah “Run-Off Election an tuah ṭhan lai i R-nih an tei ahcun 48-52 an si lai i R- nih Senate an uk/control khawh rih lai. D-nih an tei ahcun 50-50 an si lai i Vice President Elected Kamala Harris hi House Speaker a si lai i D-nih an uk/control telai ti nak a si.

Biafun nak ah, Senate he House he D-nih an tlaih ahcun President Elected Joe Biden caah cun puan phahpiak cia tluk a si lai i zalong ngai in a duhmi policy pawl a kalpi khawh lai i Trump nih a letmi policy pawl zong a thlen khawh ṭhan hna lai. A mitkuh zong a cim deuh lai. President Trump bantuk in kum 4 chung nguu manh lo in an buaiter kho lai lo i ai nuam deuh ngai ko lai. #TheChinVoice: # Vanceuuk Khenglawt