Bomb kah ruang ah Hakha, Nazareth sang inn zeimawzat a rawk, SAC nih ngaihthiam hal
NUG nih 2021 September 7 zinglei sang i D-Day a thanh hnu suimilaam 9:30PM fai in Hakha khuapi chung ah meithal le bomb thawng theih a si i bomb, meithal ruang ah Nazareth chung inn a rawkmi le biakinn an khen mi a um tiah sangmi sin in thawng kan theih.
Inn a rawk mi kongkau ah SAC Mithat hna nih September 8 zinglei ah sangchung ah ra i nizaan an khen mi pawl zohfelnak an va ngei. Min langhter duh lo sangmi pakhat nih, “Tuzing kan sang ah SAC lei tam taktak an vun ra. Inn an khen i a rawk mi an rak zoh. Ngaihthiam hna an hal hna,” tiah a chim.
Nazareth sang um Mara Biakinn zong hmun tam tuk ah an khen. SAC minung an i chok rih ca ah a rawkmi zohfelnak an va ngei kho rih lo tiah kan theih. Nizaan kahdohnak ruang ah Chin Oo Sii sang um upa pakhat fak ngai in hliam a tuar tiah theih a si. THP
Relchap: September 7, nizan zinglei ah NUG cozah Acting President Duwa Lashi La nih Myanmar ram pumpi huap dothlennak ni a thanh. Hi kong he pehtlai in US ramleng vuancizung chimnak nawlngeitu nih “Myanmar ah a cangmi buainak hi kahdohnak in tuahremh i zuamnak cu kan cohlang lo” tiah a chim.
NUG nih D-Day a thanhmi kongah US Cozah lungput zeitindah a si tiin RFA nih biahalnak an tuahmi cu US ramleng vuancizung chimnak nawlngeitu nih email in lehnak a tuah hna. Cucu a tanglei bantukin a si.
“NUG nih D-Day a thanhmi kong cu kan rak theih ve. Atu i Myanmar ah a cangmi cuahmahmi buaibainak hi kahdohnak in tuahremh i timhnak cu US cozah nih kan cohlang lo. Biaruahnak in tuahremh i zuam dingah tuanvo ngeitu vialte kan forhfial hna”.
Cu lawng si loin nawlngeihnak latu ralhrang nih kahdohnak vialte ngol ding, Myanmar ram cu democracy uknak ah ser than ding le tlaihmi violate thlah than dingin US cozah nih halnak kan tuah, tiah a chim fawn.
D-Day thanhmi kongah UK cozah zong nih “kan cohlang lo” ti cu an chim ciah lo nain US cozah bantukin phun in bia an chim ve. UK ramleng vuancizung upa Pete Vowels nih a twitter ah “Myanmar ah democracy a um than khawh nakhnga biaruahnak in a lam kawl dingah tha kan pek. Ralhrang nih nawlngeihnak an lakmi le ruru hranghrang in an cawlcanghmi cu fak piin kan mawhchiat” tiah a tial.
Ralhrangbu chimnak nawlngeitu Bochoh Zaw Min Tun nih cun UN nih Myanmar ram aiawhtu kong a ceih lai a si caah cucu NUG nih caanrem ah lak in D-Day an thanh hi a si tiah a chim ve.
NUG nih D-Day a thanh lecangka in ramchung hmunkip ah kahdohnak le puahkehnak a chuak. Tlangcung hriamtlaibu hna lei in D-Day kongah cathanh zeihmanh a um rih lo. D-Day nih cun NUG caah thatnak maw a chuahpi lai, chiatnak dah timi cu caan nih a fianter te lai. Ref: RFA; TCP
Leave a Reply