Yangon Khuapi Ah Meithal Kah Thawng A Thang Than

Tuzaan September 4,2021 ah Yangon khuapi chung hmun cheukhat ah meithal aw le bomb puah thawng a thang tiah theih a si. Hi kong he pehtlaiin PDF nih maw SAC ralhrang umnak hmun an kah hnga, a si loah ralhrang dah anmah le an mah an i hrocer nak an puah mi a si ticu hngalh a si rih lo. Yangon khuapi chungah kahnak le bomb puahnak tete cu hlan zongah theih ding a um lengmang. Sawisung

Relchap: Kawlram chaklei hawikom hriamtlaibu 3 a si mi AA, MNDAA le TNLA hna nih covid le kahdohnak ruangah Kawlram mipi harsatnak ruah in ralkap cawlcanghnak vialte ngol cio dingin nihin September 4 ah cathanh an chuah.

Cathanh nih a langhter ningah ralhrangbu nih February 1 ah rampi uknak a lak hnu dai tein duhlonak a langhter mi hna cu ralhrangbu nih an thah hna, an tlaih hna ruangah ramchung hmunkip meithal a puah.Kahdohnak zong a zual.

Kawlram chung covid-19 zawtnak ruangah mipi nunnak tampi a liam, eidin, chawlehnak zong harsatnak tampi an ton pin ah ramchung hmunkip ah kahdohnak ruangah mipi nih harsatnak fak piin an in.

Ralhrangbu nih thazaang tampi an i chap, hriamngan in khua an kah, mipi an tlaih hna, an thah hna ruangah kahdohnak a karh chin lengmang mi a si.

Cucaah, covid-19 runvennak kongah pawngkam ram le vawleicung covid runvennak phu hna he tuanti ding le mipi nih atu nakin harsatnak an ton ti lo nak ding caah rianngeitu vialte nih lam kawl cio ding le mipi harsatnak a pe khomi ralkap cawlcanghnak vialte hrial le dinter dingin pehtlaihnak a ngei mi bu vialte hna sin ah kan in forhfial hna tiah cathanh an chuah.Ref; WN;TCP