Taliban nih C an lak hnu in minung hawi cung ah zawnruahnak vialte le nuhrin covo vialte a tlau dih lai ti mi tihphannak ruang ah Afghanistan ram mitampi nih an ram chuahtak an i tim hna.
Afghanistan ram ah uknak a latu Taliban hna nih a hlan ah cozah a tlai mi Ashraf Ghani te phu cung ah hnahnawhnak le buaibainak pek lo ding in biakamnak an ngei. Cun Taliban nih a hlan Afghan cozah chan lio i ralkap an rak tlaih mi hna zong ngaihthiam ding chuah ding in an i tim. Cu pin ah ram kip fonh ralkap bu (international forces) hna he hnatlaknak ngei in rian a rak tuan mi hna, US nih 2001 September 11 thok in Afghanistan ram tuk a thok lio i a rak i tel mi minung vialte zong ngaihthiam an i tim.
Asinain, nitlak lei ram cheukhat hna nih cun Taliban pawl an vun cawlcangh deuh cun sualnak phun tampi a chuak than lai tiah an lungre a thei rih. Cheukhat ram nih cun Afghan ram mi hna nih an ram an chuahtak khawh nakhnga an bawmh hna, Ram cheukhat nih an ram ah dornak hmun an tawlrelpiak hna, Ram cheukhat tu nih cun an ramri fak deuh in an rengh ve.
Iran ram nih cun rianrang in caankarlak ralzaam dornak hmun a sakcolh, asinain Afghanistan ram a daih than tik ah ralzaam hna hi an ram ah kuat than te ding in a timh. “Afghan rammi a si i Iran ah a rak i dor mi poh, an ram dirhmun a that deuh bak in an ram ah kuat than an si lai,” tiah Iran ramri humhimnak zung in tuanvo ngeitu Hossein Ghassemi nih IRNA news ah a chim. Iran le Afghanistan ram hi 900-kilometre (meng 560) tluk ramri an i tlai i Iran ram ah Afghan miphun ralzam nuai 3 leng an um cang, tiah UN ah ralzaam kong tawlreltu hna sin in theih a si.
Pakistan ram Prime Minister Imran Khan nih, “Pakistan ram ah Afghan miphun nuai 3 leng ralzaam a um cia mi tawlrel hmanh a har caah Pakistan ram mi hna nih an ram innpa a si mi Afghanistan ram sin in ralzaam cohlan chap an duh ti lo,” tiah The New York Times ah a chim.
Turkey President zong nih Pakistan ram he i bawm in Afghan ralzaam hna an ram ah an luhchap ti lo ding in kham an timhnak kong a chim ve. Turkey cozah nih an ramri vampang hna an sak i ralzaam an phihkham hna.
United Kingdom Prime Minister Boris Johnson nih, Afghan ram mi, nunau le ngakchia deuh papek in minung 20,000 tluk a ralai mi kum chung ah UK ah umnak nawl pek ding in a timhnak kong a chim ve. Hi zat minung hi aralai mi kum hna ah cohlan an si lai i, a kum khatnak ah minung 5,000 lak hmasa an si lai tiah a chim.
Cun Canada ram zong nih Afghan miphun chung in ralzaam 20,000 tluk cohlan ve te ding in an i tim. Switzerland ram tu nih cun an ram ah direct in a phan colh mi Afghan miphun tampi cu ralzaam ah cohlan an si lai lo, asinain, ramkheel dornak sok a duh mi hna ca ah minung pakhat hnu pakhat in an case zohpiak an si lai, tiah an thanh.
United States of America ram hi Afghan ralzaam kong ah biatak tein a bawmtu a si. US ram cozah lei chimphuannak nawlngei mi nih Afghan ralzaam 15,000 tluk hi US ah thial an si cang i, ralzaam 18,000 hrawng cu US ah thial nakding ah an hngah lio a si tiah an langhter. US ram nih hin Afghan rammi minung 22,000 tiang hrawng cu cohlan chap ding in timhtuahnak a ngei.(Source : AI Jazeera)
Leave a Reply