Vuanthok Rian Ka Tuannak Cu Nihin Hi Kum Thum Tlinnak Ni A Si. Nain CDM Tuah Hna U Sih!

Bia vun deng rih ko usih: Vuantthan rian ka ttuannak caan hi kum ruk reng lo a si cang nain vuanthok rian ka ttuannak cu nihin ni hi kum thum a tlinnak ni a si, hi ni dam tein a ka phanh ter tu Pathian thangtthat si ko seh. Hi ni thengte ah ka rianttuan hawi sinah bia vorh a herh ko tiah ka ruah caah ka van vawr.

Vuantthan rian ka ttuan hnawhchan bik mi pakhat cu ka miphun caah kan ram teah bawi ttuan te ding le mipi caah tthathnemnak chuahpi te ding a si. Mipi caah tthahnem santlaiin rianttuan a duh mi pakhat ka dirhmun in kan ram sining zoh tikah tu lio caan i zung rianttuan cu mipi caah si loin ralkap caah rianttuan a si, ralkap cozah chia thapek le dirkamh a si tiah ka cohlan mi a si.

Ka rianttuan hawi vuantthan hna nan nih teh mipi caah rianttuan ding timhchih in rian na ttuan ve maw? Cu lungput he rian na ttuan a si ahcun mipi lei ah ttangin CDM rak tuah ve hram. Kan ngeih mi reng le hmunhma ah kan tthut khawh mi hi mipi thawngin a si. An caah rianttuan ding rian lianpi leiba a ngeimi kan si. Na duh thimnak ngeihmi nih chirnak an phanh pi sualnak hnga lo ralkap lei ttang loin mipi lei ttang hna usih. CDM tuah hna usih. Ralkap cozah chia caan rau lo ah tlung ruangmang seh.

VK
Vuanthok
MoE
Naypyitaw