VP Van Thio Cu Ralkap Nih Rian Tuan An Sawm Taktak Cang Hih!

Ralkap nih riansang tuan ding ah VP Van Thio an sawm i a duh lo.A lungput uar um bak.Vakok cu phaisa ruang ah a miphun a rawi lo, mifir he zong aa fonh lo.

Pu Sanmawi Nikhuai le Vomthu Maung fapa Pu Maung Ha belte cu fawi ngai in an lem khawh hna, upatmi an pale nih vancung in rak thei hna sehlaw an ningzak tuk lai dah, an zahpi tuk hna lai, pale belnang nehtu tiin. Credit: Salai Lungthli Tum

Relchih Dingmi: Yangon i umkheng tum in Min Aung Hlaing cozah an huatnak an langhtermi cu khuapi aa hnin dih ti awk in a um, lung a hmui taktak. Mah hi psychological warfare a si i lam zawh nak hmanh in hmual a ngei deuh tiah ka ruah. Ralkap phu cu a hninh ngai ko hna lai, an i theihter lai lo nain.

Hakha Keihsih sang le hmun cheukhat zong ah umkheng an tum ve. Thaizing lei zong pehzulh thluahmah ko u sih. Ramdang zong ah ralkap dohnak nan langhter ciomi hmuh tikah lung a hmui tuk, khawika hmun poah in kan doh a herh. Mah le ti khawhnak lam in ralkap uknak chiahru doh hi kan tefa hna caah dothlennak kan tuah phun khat a si ve.

Umkheng an tum ruang ah ‘hna an chet’ tiin a zai lenmi cheukhat kan hmuh hna i ngaihchia ngai cu a si, pumpak i tel khawh ve lo hmanh ah thazaang dernak a tuahtu cu si hram hlah u sih.

Relchih Dingmi: Suu Kyi cu a inn ah radio an hmuh caah uknak firtu Min Aung Hlaing phu nih taza an cuai. President Win Myint zong a inn hmai a rami NLD tanpitu pawl a kut a zaoh(wave) hna an ti caah taza an cuai ve.

Ralkap uknak cu sehtan pennak bantuk a si caah tlaih an duhmi poah cu a herh lomi aruang an kawl i an tlaih ko hna, an hrem ko hna. Mah hi kanmah cio cung ah a tlung ve te lai. Ralkap uknak a nun thai ko ahcun voih voih sual ruang zong ah thongthlak kan i huah te kho.