USA Dirhmun Cu Thinphang A Si Ko, Rian A Ngeilo Mi 30 Million An Phan Cang

US ah rian ngei lomi 30.3 million kan phan. State cozah nih stay at home le Lock down order an chuah caah minung tampi riantuan khawh a si ti lo. Company tampi an khar. Cozah zung tam deuh zong inn in tuan a si. Essential timi tuan lo awk le khar lo awk a tha lomi pawl lawng on le tuan a si. Small business a tuahmi pawl hi a cei bik dingmi an si. Mah ruangah cozah nih PPP timi bawmhnak in chanhchuah a timh hna.

Tutchun tiangah rian ngei lomi minung 30 million kan phan. Rian ngeih lo ruangah cozah bawmhnak Unemployment benefit a sawkmi, 3.8million an si cang. US riantuan mi minung 6 ah minung pakhat cu rian ngei lomi kan si cang tinak a si. US State 9 ah on hram an thawk. State 15 ah a cheu bang in an on. Atang mi state tam deuh cu May 1 silole May 15 thawk in on an timh.

Unemployment tam deuh an sawknak state pawl hi democrats pawl cozah an sinak state a tam deuh ti a si. Tuan deuh i a ongmi pawl hi Republican cozah an sinak state a tam deuh. Democrats pawl governor an sinak state cu an on a nuar deuh. Federal cozah sin zongah bawmhnak an hal. Cozah nih nan kan bawmh lo ahcun kan ong kho lai lo a timi tiang an um. Asinain Republican governor an sinak state tam deuh ahcun white house task force hna nih guideline an tuahning tein on hram an thawk.

Tulio President Donald Trump cozah nih an phan ngaimi cu business on hnu, company pawl on hnu zongah riantuan duh loin cozah bawmhnak unemployment benefit lawng a ormi an tam tuk sual lai ti an phang. Cucaah Federal cozah nih rian on ko nain riantuan a duh lomi pawl zeitindah kan rengh hna lai timi an tuak lio a si.

Democrats pawl cozah an sinak state ah hin Sanctuary cities timi an um. Phung loin US ah a lutmi Illegal tampi an um. Mah pawl cu state cheukhat ahcun driving license zong an pek hna i medicaid le Food stamp tiang zong a pemi khua an um. Mah bantuk khua ahcun crime zong a tam deuh caah Federal cozah nih state cozah cu an nawlngeihmi chung in an rengh tawn hna. Cucaah Federal cozah nih mah bantuk sanctuary khua ummnak state cu federal cozah bawmhnak kan in pe hna lai lo tiah rengh an timh hna.

Credit: Salai Lairamthang

 251 total views,  1 views today

This function has been disabled for Chin 11 News.