US Um Laimi Chungin A Zawmi Tam Ngai Dawh Kan Si; By Salai Lairamthang

Tuchun tiangah US ah a thimi, minung 61669 an si. Nihnih chungah minung 4866 an thi chap. A zawmi 10645771 an phan. Ni hnih chungah a zawmi, 54065 an i chap. White House Task Force hna nih April 14 an tuakning ahcun minung 74073 an thi kho tiah an tuak. Tutiang ah zawtnak a chek cangmi mi 6 milion renglo an si cang. Minute 15 lawng a raumi, Virus icheknak in nifatin minung a sing in an chek khawh cang hna. Antibody testnak zong New York ah an hman cang.

Nizan tiangah adam thanmi dihlak, 147411 an si. Ni hnih chungah a dam thanmi minung 8249 an i chap. New York khua lawngah a thimi minung 22623 an si. Ni hnih chungah minung 851 an thi. New York khua pakhat lawng i a thimi minung hi US ram pumpi a thimi 35% tluk a si.

US um Laimi zong a zawmi tam ngai dawh kan si. Indianapolis lawngah a tlawmlei in minung 40 cu zawt dawh an si. State dang zongah a zawmi an um len. A zawmi nih an chim duh lo caah azaw mi zet theih a har ngai. Washington D.C Area um, Chin miphun chung in Tedim lei kan unau minung 20 an zaw ve. Hakha lei a zawmi kan hngal rih hna lo.

President Trump nih Covid-19 ruangah harnak a tongmi hna bawmhnak stimulus checks pek chap dingah ruahnak a ngei i, white house advisor hna nih an tuaktan lio a si. May thla chungah hin Congress ah an chuahpi than lai i, White house, Senate le House nih an lungtlin ahcun minung pakhat nih $1200 hmuhmi bantuk kha hmuh than khawh a si te lai.

Director of National Institute of Allergy and Infectious Diseases le White House coronavirus task force, chungtel pakhat a simi Dr.Fauci nih Gilead Scientist hna nih an sermi remdesivir si a hmangmi hna cu 30% an dam a rang deuh tiah tuchun ah white house ah a chim. National Institutes of Health hospital ah coronavirus in a zawmi minung 397 cu phu hnih ah an then hna i, an test hna i, phu khat cu ni 5 chungah an dam i, adang phu khat cu 10 chungah an dam.

Gilead nih testnak an tuahmi hna chung in 50% cu zarh hnih chungah an dam dih tiah an chim. A zawmi chung in 65.5 cu ni 5 chungah an dam i, 53.8 cu zarh hnih chungah an dam ti a si. Gilead nih an testmi result an chuah le cang ka in Stock market cu 400 points a kai manh. FDA nih hman ding le hman lo ding biachahnak an tuah hmasa lai. Emergency caah cun hman colh dawh a si. Tuchun White House i meting an tuahnak ah, Fauci nih “This is very optimistic.” a ti . President Trump zong nih “Certainly it’s a positive, it’s a very positive event.” tiah a ti ve. FDA nih approve an tuah le cangka mizaw thopnak ah hman colh a si lai.

 238 total views,  1 views today

This function has been disabled for Chin 11 News.