US Rammi Sinak Chuhthannak Kong Phun 4 Hi Kan Buaituk Caah Fiangtein Kan Tial

By Chelsea Bawi

Ralhrang (Terrorists) le raltuk lio i thatlonak a kemhchimi ralkap pawl (war crimes) le, hranhram loin nu/pa sualpinak a tuahtu pawl (sex offenders) le, lih in rammisinak a la mi pawl (fraudsters) rammi an sinak chuhpiak an si mi kong hi thatein hlathlainak le taza cuainak rian biatak thlak in hma la chin lengmang dingah Civil Division nih Denaturalization Section (rammi sinak chuhthannak phung) tengnge an ser chap.

Rammi sinak chuh thannak kongah a thar in dothlatnak le tazacuainak dirkamh tu dingah Department of Justice nih nihin ah phung tengnge pakhat an ser chap. Civil Division’s Office of Immigration Litigation – District Court Section le Applellate Section chungah a ummi phung tengnge chungah Denaturalization Section nih hin rian a tuan lai. Lihfangfak in rammi sinak ai ngeihmi, Terrorists le raltuk lio i thatlonak a kemhchimi pawl (war criminal) le, hranhraam lo in nu/pa sualpinak a tuahtu pawl (sex offenders) le, deh le hlen rumro in ai lami pawl Department of Justice nih ai hmaithlakmi rian hi tutan an ser tharmi phung tengnge nih hin tampi a dirkamh khawh lai.

Office of Immigration Litigation hi rammi sinak chuhpiak thannak kongah 95% tluk in a hlawh a tling ngai cang ko nain, rian biapituk a si ve caah phung tengnge serpiaknak thawngin hi rian hi thawnter ko rih u sih, tiin law enforcement lakin a timi an tam chin lengmang cang caah, a tu bantuk in an sernak hi a si.

Terrorist, asiloah sex offender (hurduh cuainak hramhram in a kalpitu) pakhat hi dehhlennak hmangin US rammi sinak a vun i ngeih tikah cun, kan i ngeihmi kan system a chiatchuahtu thil a si hnga i, a bikin, cu bantuk misual hna kut ah fahnak a ingmi hna (victim) pawl ca ko ah hin thil tha lo ngai a si hnga. Phungning lo piin rammi sinak ai ngeihmi pawl an konglam dothlatnak dingah siseh, cun dehhlennak hmangin a cawlcangmi pawl an tuahsernak bangin tuanvo lakter dingah tutan kan sermi phung tengnge nih hin Department of Justice hi a thathnem ngaingai lai, tiah ka ruah, tiin Assistant Attorney General Jody Hunt nih a chim.

Rammi sinak chuh khawh thannak dingah cun, minu, mipa nih ai tlaihmi rammi sinak lehmah kha phung hei ai kalhmi, asiloah a deu a si lawnglawng ah cozah lei nih rammi a sinak hi an chuh khawh ding khi a si. Rammi sinak chuhnak rian hi ramri a ngei lo. Cucaah, the Department zong nih cun sining le dirhmun a phunphun ai ngeihmi pumpak minung tampi sinin an rammi sinak a lakpiak (chuh) than cang hna. Cuhna lakah cun terrorist, asiloah US ram himbawmnak a hnursuangtu, war criminals, nuhrin covo (human rights) a buartu, sex offender, le a dangdang mi lihchim pawl (official capaar cungah) hi an sihna.

(1): National Security/Terrorism

U.S. v. al Dahab, No. 15-cv-5414 (D.D.C.). Hi pa hi Egypt ram ah terrorism kalpitu a si i, US ah a ummi al Qaeda pawl a puumkhawmtu hna le, Egyptian Islamic Jihad terrorist phu caah California ah ton biaruahnak phu a sertu zong a si. Egyt a um lio tein US rammi a sinak cu an chuh i, a passport zong an chuh pinah US lei kir an onh ti lo.

U.S. v. Kariye, No. 15-cv-1343 (D. Or.). Hi pa zong hi Afghanistan ah jihadist training camp ah training a kai ve i, Osama bin Laden le a dangdang terrorist hruaitu pawl he pehtlaihnak a ngei i, US cozah nih terrorist phu ah a chiahmi hna le al-Qaeda he pehtlaihnak a rak ngei bal mi Makhtab Al-Khidamat hei ti bantuk terrorist phu pawl he pehtlaihnak a ngei. No Fly List ah a min ai tel ko nain, the Office of Immigration Litigation nih Somalialand lei ah an kuat (deportation).

U.S. v. Hamed, No. 2:18-cv-0424 (W.D. Mo.). Anih zong hi Iraq lei ah tax pek lo bakin (tax-exempt) $ 1 million a thlitein a kuat caah le, US ah non-profit organization account ai ser i, cu account in cun vawlei pumpi nih terrorist phu ah chiahmi Jordan a ah a ummi misual phu sinah a kuat peng caah, a rammi sinak an chuhpiak.

(2): War Crimes & Human Rights Violators

U.S. v. Dzeko, No. 18-cv-759 (D.D.C.). Bosnia ah le Balkans buai tan i POWs cawlcanghnak an kalpi lio ah hriamnam ai ken ve lo mi mipi minung 8 a thah hna. Bosnian thongiin a tlak lio ah a rammi sinak cu an chuh i, thonginn in a chuah hnu zongah US luh thannak nawl an pe duh ti lo.

U.S. v. Yetisen, No. 18-cv-570 (D. Or.). Anih zong hi Bosnia ah le Balkans buai tan i POWs cawlcanghnak an kalpi lio ah hriamnaam ai ken ve lo mi mipi minung 6 a thah hna caah rammi a sinak an chuh ve.

(3): Sex Offenders

U.S. v. Omopariola (N.D. Tex.). A chungkhar minung kum 7 lawng a si rihmi a sualpi caah, tiin rammi sinnak an chuh.

U.S. v. Lopez, No. 18-cv-00527 (D. Md.). Nu pakhat kum tamtuk chung nolhcip in a sualpi caah, tiin rammi a sinak an chuh.

U.S. v. Arizmendi, No. 4:15-cv-454 (S.D. Tex.). A sianghngakchia telhchih in, midang tamtuk a sualpitu hna a si. Sex offense ruang i Mexican thonginn a tlak lio ah US nih a langin rammi a sinak an chuh i, thonginn in a chuah hnu tiang zongah US pal an onh ti lo.

(4): Fraudsters & Other Criminals

U.S. v. Mondino, No. 18-cv-21840 (S.D. Fla.). $24 million renglo an chiahnak US Export-Import Bank kongah dehhlennak a tuahtu a si. $24 million lakah hin $12 million tluk a tlauter (a vaivonh). Ram chungin an dawi colh ve.

U.S. v. Warsame cases, Nos. 17-cv-5023, -5024, -5025, -5027 (D. Minn.). Diversity Immigrant Visa Program hmangin US ah luh an duh caah, chungkhar khat kan si ko hna, tiin lih fangfaak in a chimtu minung 4 cu an rammi sinak an chuh hna.

#US Citizenship nai ngeih hnu zongah an in chuhthan khawhnak sualnak hi a tlangpi in 4 asi.

 252 total views,  1 views today

This function has been disabled for Chin 11 News.