US Raltuknak Vanlawng A Phur Mi Khualtlawnnak Tilawng A Chuak Cang

American raldonak Vanzam phur Lawng khualtlawng dingih a pawk suak hlan te ah N.Korea in missile kap in an thazang an lang ter
~~~~~~~~~~~~~~~~~~~~
The Rihli Voice
March 28, 2023
Korea tikulh sung American raldonak vanzam phur Lawng a ra thlen ding zawngah N.Korea cun hmun nai kahnak missile pahnih a kap suak.

March ni 27 zinglam ah N.Korea ih Huanhi hmun ihsin missile pawl an kah suak mi a si ih Km 370 hlatnak Japan tipi par ih a tlak thu S.Korea ralkap pawl in an sim. Japan khal in missile pahnih cu an ram tipi leng, Special pursumnak zone an hminsannak tipa ah a tla tiah thu an suah. N.Korea pawl ih missile an kah san ruangah S.Korea khal, Japan khal in an duh lonak thu an than.

American ti ralkap ih USS Nimitz raldonak Vanzam phur Lawngpi hoha mi raldonak Lawng rual pawl cu March ni 28 ah S.Korea ih Busan khawpi Lawng colhnak ah thleng ding an si ih an thlen hlan te ah N.Korea in missile a kah mi a si.

N.Korea cun kan dung naite khal ah S.Korea le American ralrel zirtlangnak an neih mi lehrulnak ah missile phunphun an rak kap san dah. Amerian ih Indo-pacific ralkap zung cun N.Korea ih missile a kah sin mi in tulsung American ih ralkap pawl le a rualpi pawl direct in a hro lo nan tualsung remdaihnak a ti siat tiah an sim.

N.Korea cu kan dung zarhte khal ah Nuclear bun thei mi tisung hman mi drone phun khat an rak kap sin zo. Himi ralthuam a puak kuai pang asile ralpawl ih tipi kap tluan cu ti suar thoter thei ding tiang a tuah thei ti ah N.Korea cun puar thau zet in an sim.