US Presidential Election Update: Teinak cotu i fiang baibai hram ko seh.

President Trump team nih Vote an rel dih tik ahcun Arizona ah teinak kan co lai caah Biden nih tei dingin thawngthanhnak nan tuah chungmi (projection) hi let t’han uu, tiah Fox News ngeitu Murdoch cu Jared Kushner nih phone a chawnh nain alet duh lo. Hi kongah rianngeitu nih a lam kenkip in an zohfel hnu ah chimchungnak an tuahmi asi i a dik ko lai tiin a dirpi hna.

Biden team nih Nevada le Arizona ah teitu kan si hlei ah Pennsylvania zong hi kan lak lai i Georgia hmanh hi theihlo bak asi cang tiah an ti ve. Pandemic ruangah voidang nakin mail-in votes a tamtukmi le States kenkip nih mail-in votes rel thok khawh caan zulhphung an ngeihmi aa dan ciomi nih ti a nawiter ngaingai. Tutan thimnak ah an State cozah sin ah mail-in votes a haltu hi million 80 renglo an si i voidang election nakin alet renglo in a tam deuh caah election tawlreltu secretary of states zung cu an chaihma ngaingai.

Mail-in votes hi voidang thimnak zongah rak hman pengmi asi hlei ah State pakhat (parliament) legislature cio nih tawlrel dan phunglam an ser ciomi asi. Cheukhat States ahcun tuan tein mail-in vote rel an thok khawh nain States zeimawzat ahcun Election Day zung an khar hnu lawngin rel thoknak nawl pek an si. Atutiang an result a fian khawh rih lonak States hi aa cuhmi an itluk ngaingai lawng si loin mail-in votes rel a thok tlaimi deuh an si.

“Votes an rel dan a fum tuk” tiah mawhchiat a tong ngaimi poll riantuantu pawl khi anmah State cozah cio nih an sermi phungning tein thazaang a chuahmi an si. Atu lebang cu mi cheukhat nih an zung hram in an dironh hna caah an luhchuah tikah palik nih an motor chung tiangin an thlahdon cang hna i an him lo ngaingai.  Credit: Biak Hnin Sang FB