US President Hlun George W. Bush Nih Trump A Rem Ruam Ve Lo, Duhlonak Langhtertu Pawl Thazaang A Pek Hna

US vawlei ah miphung thleidannak a um peng rihmi ralchanh in duhlonak an langhtermi hna cu US president thing George W. Bush nih a conglomh hna rualrual in, duhlonak langhter lo dingin a khamtu hna pawl cu faak ngaiin a mawhchiat hna.

White House lenglei ah Trump chuahvah a duh ruang i daitein duhlonak a langhtertu mibu pawl ralkap le police thazaang hmangin an thio dih mi hna thawngpang a theih hnu ah a tu bantukin Bush nih bia a chim ve hi a si.

“A thadeuh mi lam a um ko dawkaw – zawnruahnak, khat le khat nun i aptinak, ralthatein cawlcanghnak le dinnak ah hram a thlami daihnak hmuh khawhnak lam a um ko. Hmunkhat te ah kan tangti lai i cu a thadeuhmi lam cu kan i thim te ko lai, tiah zumhngamnak ka ngei ko,” tiah Bush nih a chim.

Floyd thah a tonmi kongah ka lungthin a faak ngaingai. Nautat le namhnul a tongmi black American pawl hi vunrang (white) American pawl nih kan dirpi, an aw kan ngaih i kan theihthiam khawh hna nak a lam kan kawl awk a si, tiah Bush nih vunrang pawl cu thazaang a pek hna.

Avoi 43nak President a si mi Bush nih hin minfang kheh tein cun Trump hi a cemh lem lo nain, dawtnak le lung i khahnak um dingin thazaangpeknak bia a chimmi zoh tikah Trump biachimmi he cun ai ralchanh ngaingai ti cu chim hau lo khi a si.

“Ceu lakah kanmah le kanmah kan i hmuhfian khawhnak dingah cun fahnak huah a tongmi le a ngaihchiami hna an authawng hi kan hna kan chitpiak hna a hau. Cu bantuk authawng daihter a timtu hna paoh cu “America” timi a sullam hi an pem lo tinak a si – asiloah zeitindah America hi khuasaknak caah a thadeumi hmun ah a hun i can khawh ning a si, ti an pem lo tinak a si. Nautatmi, namhnuulmi le pheu a tongmi hna an mit (khuachonhnak mit) kan i bunh/hman lawnglawng ah America a sining taktak hi kan hmuh fian khawh lai, tiah Bush nih a chim.

Police pawl nih thazaang chuah riangmang in duhlonak a langhtertu pawl heh ti i an nam hna hi thil dawhcah a si lo. A ngaingai ti ah cun, police bantukin upadi (law) lei tuanvo a ngeimi nih duhlonak a langhtertu pawl an kilven hna tikah khin pei “a thadeuhmi hmailei caah,” tiin lam an zawhnak hi a hung thawndeuh tawn lehlam cu, tiah Bush nih a chim.

President a si bangin, Bush zong hi mipi nih duhlonak an langh hnawh tawn ve ko. Iraq kah dingin ai timh lio ah siseh, African American communities a hrawktu Hurricane Katrina a rawlrel ning kongah duhlonak an rak langh hnawh bal. Bush te chungkhar hi Trump he an i hmuthiam lem lo i, a minfang khek in soisel cu an hrial peng ko nain, a politics (Trump i a politics) hi an duh bak lo, ti cu a fiang.

Cu bangin Bush nih biachimnak a ngeih dih le cangka, amah chan lio i former chairman of the Joint Chiefs of Staff a si mi Mike Mullen zong nih cun Trump nih ralkap thazaang hman riangmang in duhlonak a langhtertu pawl thio dih a timhmi hna kongh Trump cu faak taktak in a hun soisel ve.

Hman vai thlak duh ruang tuktak hna i, a kalnak lam sialpiak dingin daitein duhlonak a langhtertu pawl thio dih hna dingin ralkap thazaang a hman mi hrimhrim hi kan lung a rawk ngaingai. Biakinn lei panh in a vung kalnak a ruang hi zeibantuk a va si ko hmanh ah khin, ram chungah daitein duhlonak a langhtertu an nuhrin covo (rights) zeiah a relpiak hna lo ah a cang i, kan ram chung buainak a tlun ruang i a tha a nuammi ramdang hruaitu hna pawl an lung a thawhter chinchin leh lam hna bantuk a si. Cun, hriamnaam ai kenmi kan ralkap pawl lila zong politics lei ah mer a thimh viar hna bantuk a si, tiin Mullen nih a chim.

Nihin i duhlonak an langhtermi vialte hna i a hrihhram taktak cu African American pawl nih an ton cuahmah mi a fehtuk cangmi miphun thleidannak hi a si, ti hi mipi nih nan i fian awk ah a herh, tiah president Bush le Mullen hei ti bantuk nih an hmuhning an chim cang.

Catialtu: Chelsea Bawi

 817 total views,  4 views today

This function has been disabled for Chin 11 News.