US Laimi Vialte Nih Hi Thil Hi Fiang Tein Nan Theih A Herh Ngai!

Note: Hi ca hi Chin Community of Indiana (CCI) nih indychins.org ah an ttialmi asi. Oct 16, 2017 ah an rak ttialmi asi nain a tu tiang asi peng rihmi asi caah a thei lomi le a fiang lomi caah ka vun thlah tthan! Hi thil hi US Chinmi, a bikin Indiana i a ummi nihcun theih hrimhrim a ttha. Rian a kan ttuan piak tu hna hi zeidah an ttuan timi hna theih i upat pek ve hna hi a tthami thil asi!

Chin Community of Indiana (CCI) cu USA ram ah Chin miphun milu tambik umnak hmun Indianapolis, IN ah dirhmi le rian a tuan cuahmah mi bu a si. Chin Community of Indiana (CCI) nih nifatin in mithmuh kut tongh in rian a tuan cuahmah mi a um bantuk in zapi nih theihthlu theng lomi Community caah riantuannak hna zong tampi a tuan chuah cangmi a um. CCI cu Indianapolis khua ah ummi Chin miphun dihlak a huap khomi bu a si i, hruaitu upa hna zong ah Chin miphun dihlak lungrual in rian a tuan cuahmah mi bu pakhat a si.

Chin Center

Chin Center ah hin caantling riantuantu hna pahnih hna nih Chin Community caah heh tiah thazaang le thiamnak chuahin rian an tuan. Cu tin rian atuan liomi hna cu Pu Moses Lian le Pu Henry Mang hna hi an si. CCI nih 2015 kum thawk in caantling riantuantu hna hi a ngeih khawhmi a si. Mah hi fulltime riantuan tu hna nih hin nifatin an tuan mi thil tampi lak ah a tlangpi in rian an tuanmi hna cu (1). Rian kawl le rian sawkpiaknak (2). Carel piak le phone call piaknak (3). Chin community chung pehtlaihnak (4). ESL class caah tawlrelnak (5). Greencard le Citizen kong cawnpiaknak le sawkpinak hna hi a tlangpi in an tuan cuahmah mi cu a si.

Ni fatin tein Chin Center office cu zing 9:00am in 5:00pm tiang hi office hour a si. Mah hi caan chung ah hin Chin miphun si mi he si lo mihe dihlak in Chin Center ah bawmhnak pek a si. Thlakhat ah minung 800 in 1000 kar hi Chin Center nih a bawmh khawh peng. Cu tin a bawmh mi hna cu a ruang a phunphun in a um. Carel piak le phone call piak tbtk le zung le hmunhma panhnak dingmi caah address le phone hna kawl piak le chawnh biak piaknak tuahmi hna hi CCI ah volunteer mirang mi bak zong nih tampi a kan bawmhmi a si. Citizenship le Greencard sawknak ca zong ah cachimtu hna le shihni a kan bawmtu hna zong an um. ESL cachimtu hna zong Local mirang hna nih chimh a si. Riankawlpiaktu Pu Moses hi Guam in a rak phak ka in nihin tiang hi Chin miphun caah rian a kawl pengtu a si tik ah Indianapolis khua hrawnghrang rian le khai cu a theih ngai dih pin ah pehtlaihnak tha tein a ngei ciami a si. Cu ti cun minung zong tam lak te Chin Center nih rian a hmuh piak cang hna. Hi vialte hi a man lak lo tein CCI nih rian a tuannak cu a si.

Khrihfabu kip in minung phuntling in CCI cu panh a si. CCI a lengmi hna dihlak cu visitor signin sheet ah min khumh dih a si caah, a cung lei ah kan chimmi minung 800 in 1000 kar nih thlachiar te Chin Center an panh timi hi record catlap tlamtling in Chin Center ah chiah a si. Khrihfabu kip caah caseworker rian le riankawl piaknak rian hi Chin Center nih tampi a tuan chuahpiak ti khawh a si.

Chin Community of Indiana CCI hruaitu hna hi Board of Directors le Executive Committee upa hna tiin um a si. EC le BD tian a tawinak in auh a si. 2017 kum ah thim tharmi EC upa hna cu mah ka hin hmuh khawh an si i, BD hna zong mah ka hin hmuh khawh an si. An nih upa hna nih hin Chin Center riantuannak kong pin ah hin Community dihlak caah huap in Local cozah he a herhmi caah pehtlaihnak siseh meeting siseh tbtk hna hi a herh caan poh ah ngeih a si. Police lei siseh a dang dang bu le office lei hna nih kan community pehtlai an duh mi hna um tik zong ah mah hi upa le hna he hin ton le chawnh biak cu a si.

Aluan ciami kum hna ah Southside ah cozah lei bawmhnak sawk khawhnak zung um khawhnak ding caah siseh, sichunhnak hmun a umnak ding caah siseh, BMV office ah laica le kawlca in caminpuai phit khawhnak ding caah siseh CCI upa le hna thil lianngan tampi an rak tuan chuah. Cu pin ah Chin Community caah huap in Advocacy tiin bia chim piaknak siseh dirkamhnak siseh mah cu CCI upa hna nih an tuan chuah lengmang mi a si.

CCI riantuannak cu cozah le a dang dang in bawmhnak um khawhnak ding caah riantuan cuahmah cu a si. Sihmanh sehlaw nihin tiang ah hin Chin Center office um khawhnak ding caah Chin Community chung Khrihfabu le Business hna lila nih thazaang nan chuah mi nan dirpimi hi a bik in CCI rian a tuanter khotu cu a si. Mah hi dirpinak hi um hlah seh law, CCI rian kan tuan kho hnga lo. Rotary foundation nih kumkhat ah cuzat tiah bawmhnak cu um hmanh seh law, Community Chung lila in bawmh chanhnak hna nih hin CCI thazaang cu a si. Cu tin Khrihfabu hna le Chin Business hna nih dirpinak nih hin minung tam taktak nunnak hi a sersiam i thathnemnak achuahpi cuahmah ko.

Riantuan dingmi tampi a um i, CCI nih hinak in tam deuh Staff hire khawh ding caah siseh, rian kawlnak le carel piaknak tbtk a cung lei chim mi hna pin ah khin phun dang dang caah riantuan piaktu hna caantling in ngeih khawh dingin zuam chuah cuahmah a si.

 569 total views,  1 views today

This function has been disabled for Chin 11 News.