US Lai Mi Caah Theih A Herh Taktak Mi, Covid-19 Hartong Mi Hna Caah Avoi 2nak Bawmh Le Bawmh Lo

Coronavirus ruangah harnak a tongmi US mipi caah cozah nih a voi 2nak stimulus check bawmhnak pek le pek lo ding a fiang deuh rih lo.

Thaizing June 1 ah Senate ah Senator pawl meting a tuah lai i, Democratic Party nih House ah an rak pass cangmi, Heroes Act timi $3 trillion coronavirus relief package cu ceihmainak an tuah lai tiah zumh a si. Senate nih an a dihlak in an cohlan khawh lo hmanh ah Republican party he a thar in ceihhmainak ngeih hnu ah a thar in bawmhnak bill an chuahpi than men lai ti zong thawngpang a leng.

Senate achun Republican party minung an tam deuhnak a si caah Democrats hna nih an duhning zapi in an cohlan lai zumh a si lo. Asinain President Trump le Republican hruaitu hna cheukhat chimning ah bawmhnak pek hi cohlan dawh an si. Asinain zeizet timi le zeitiphun dah kan bawmhnak hna lai, harnak a tong taktak mi lawng bawmh an duh hna. Virus he pehtlai lomi tiang va bawmh kha Republican party nih an duh lem lo. Zeicatiah company ngan pipi le small business a tuahmi caah bawmhnak pek a si cang. Cun rian ngei lomi caah unemployment zong pek a si cang. Asinain voikhat bawmhnak lawng in a za lo timi cu cohlan dawh an si. US cozah nih leiba tamtuk a ngeih dingmi hi an ttih ngai fawn.

Thaizing ah an ceih dingmi bawmhnak Senate nih an cohlan a si ahcun nupi/va ngei lomi hna, single poahpoah $1200 a si lai, Fa ngei rih lomi nuva caah $ 2400, fa pathum tiang a ngeimi caah $ 6000 tiang nah khawh a si lai. A voikhatnak bawmhnak i kum khat chung nan ngahmi income ning khan tuak than a si lai.

Catialtu: Salai Lairamthang

 282 total views,  1 views today

This function has been disabled for Chin 11 News.