US in Laitlang Tangka kuat kong ah i sik nak fakpi a chuak! VIDEO

US in Laitlang Tangka kuat kong ah i sik nak fakpi a chuak timi Video hmang hin thazaang rak la ve tuah hi kong hi ruahphu ngaingai mi le theih a herh taktak mi asi a ttha kho taktak!

Life lesson caah le Moral lesson caah kan tuahmi a si i tlamtlinh lonak tampi a um lai. Avoi khatnak kan tuahmi a si caah hmailei tha deuh in kan i zuam lai.

Ramdang a ummi cheukhat nulepa cu kan fale caah a herhmi tuahpiak hmasa loin Laitlang lei chungkhar longte a ruatmi kan um. Cu nih cun fale caah tampi lungdonghnak a pek hna timi hmuh khawh a si. Sianginn caah an herhmi $100 hmanh kan pek hna lo tikah hawile hmaiah ningzak in an um theu tawn. A hnu ahcun nulepa hmanh an herhmi phaisa an hal ngam ti hna lo. Cucaah, hika kan fale hi zeidah an herhmi a si timi tuaktan hnuah Laitlang le kan chungkhat hi ruahpiak hna usih timi langhternak a si.

Credit: SALAI RO BIK LIAN

Theih tlei dang asi a tang hi:

Upatmi Saya Tluang, Nanmah bantuk upa lungfim(technocrat) pawl nih kap ttanhnak um lo tein ramkhel ah zapi lungfiannak (voter education) ca dingah atu bantuk in can pekin biahalnak nan hun kan tuah caah kan ilawm khun.Ahmasa bik ah kan hmuichon(slogan) a simi “MIPHUN COVO LAKTHAN DINGAH” timi kongah fianternak tawite ka hun tuah ta lai. Pakhatnak ah miphun covo timi cu atlangpi cun mahte-khuakhannak (self-determination) kha a si ko i cucu federal phung kha kan ti duhmi a si ko.

Pahnihnak ah ‘cucu zeiruangah dah lak than a herh?’ ti si ahcun miphun dang (asiloah) midang nih an kan chuh caah a si. A tawinak tein hun chim ahcun Mirang nih kum 60 chung an rak kan chuh/pen. Cu hnu ah kum 1948 ah zalennak kan ngah nain, cucu kan kut ah kir hlei loin midang kut ah a tla/taang than hoi. Nan theih cio bang 1947 ah Pinlung Hnatlaknak kan tuah i 5nak ah “miphun cio mahte ukpennak tling” ngeih ding ti aa tel nain Kawl cozah a dotdot nih cucu an buar i nihin tiang an zal ah an isanh peng. Cu miphun covo cu khuakhirh than ding kan timi a si.

Cucu CNF nih remdaihnak tuah dingin kum 2012 ah an rak luhka ah fiang tein an rak chim ko khah, “nan kan chuh mi kan covo rak kan pe tthan uh ti dingah kan ra” tiah. Cucaah CNF he kan nawrmi hi aa khat kan ti peng nak a si.
“(1) Miphun Covo cu aho sinin dah nan laak tthan lai?”

# Lehnak: Acung kan chimmi ah khan a fiang ngai ko cang lai. Mirang kut in kan luat hnu kum 70 renglo kan miphun covo chuh kan si rihmi hi aho nih an kan chuh i aho zalchung ah dah a um tital cu kan ifiang dih ko hnga lo maw. Athlithup in an kan firpiakmi zong si lo cumu. Ralkap lawng puh awk a tha lo. U Nu democracy cozah (1948-1962) chan in aa thawk i Ne Win (1962-1988), Ralkap Uknak(1989 in 2015), NLD+Ralkap (2016 – 2020) ninin ni tiang. Cucaah fianghlang in chim ko ahcun “Kawl (cozah+ralkap)” sinin kan lak than lai. Ka nolh than lai Kawl Ralkap lawng puh lo ding. Ne Win ralkap cozah kai hlan in an kan chuh cangmi a si.

“(2) Miphun Covo cu zeitindah nan laak lai?”

# Lehnak: Thimnak ah teinak kan hmuh ahcun Miphun Covo cu atlawm-tam in kan ngah khawh ko lai. Ngah khawh nakin kan izuam ko lai. Asinain kan miphun covo dihlak (self-determination & federal) tling cu kanmah lawng cun kan la kho dih lai lo__kan lak khawh dih lai kan ti bal fawn lo. Tlangcung hriamtlai le tlangcung party le tlangcung mipi dihlak kan idirkamh lawngin kan ngah ding khi a si. Party pakhat le hriamtlai buu khat lawng nih ngah khawh dih ding a si lo caah. Hluttaw chung lawng zongin a ngah thlu ding si lo i remdaihnak cabuai (peace dialogue) lam in nawr ahau. Cu cabuai ah miphun party kan itel a herh zia kha Dr. Lianhmung Sakhong nih fiang tein a chim ko khah.
“(3)Miphun Covo laaknak ah Caan zeizatdah nan rauh lai?”

#Lehnak: hi Miphun Covo khuakhirhnak lamthluan kan kalpimi hi dothelnnak(revolution) a si i kum 70 leng a rau cang i zeican kan rauh rih lai kan thei lo. Hriamtlai nih a leng in meithal in an nawr i ramchung in party le mipi nih upadi tangin kan nawr ve— kan i tthuan. Pu Zing Cung nih a chim zungzal bangin hi lamthluan hi mipi dothlennak (people revolution) a si bantuk in Tlangcungmi pawl miphun ah kan ifuntom i kan tthawn deuhdeuh le kan ngah tuan deuhdeuh lai tinak si ko. Mizoram ngahmi miphun covo tluk tal hi cu tuanhngan ah ngah kan duh ko cang. Kanmah chan hi a hnubik kuanfang (the last bullet) si usih ti kan duh ko cang.

“(4)CNLD nih Miphun Covo Lakthan Dingah 2008 Constitution remh hmasa hau nan ti maw?”

# Lehnak: Kan miphun covo khuakhirh than nakding caah 2008-Phunghrampi remh hmasa a haumi a um i remh hau loin ngah khawhmi zong tampi a um ve ko. Kan chim cia bantuk in kan miphun mahte-khuakhannak (self-determination) caah a herhmi federal phung tling ngah nakding ahcun 2008 Phunghrampi cu remh hrimhrim cu a hau. Cu Phunghrampi remhnak cabuai ah Chin party kan itel lo sual ding belte phan awk a um. Nai ah NLD hruainak Hluttaw ah Phunghrampi remhnak cabuai ah tlangcung party dang an itel dih nain Chin party kan bau khah. NLD nih an remh duhmi dal 114 chungah tlangcungmi kan covo/duhmi pakhathmanh ai tel lo i atu an Manifesto policy 150 zongah pakhat hmanh aa tello tikah anmah lawngin a ngah lo cumu.

Pahnihnak ah Phunghrampi remh hau loin tlangcungmi kan covo lak than khawhmi, tuah khawhmi tampi an um ve ko. Voi tampi hihi kan chim cangmi a si ko. Tck…

#Chin Miphun Ni (CND) zung khar ni ah ser ding,

#Chin State ramri an kan enmi pawl khuakhirh than ding,

#Chin Act upadi fehter than i Chin nunphung (customary) vialte kilven ding,

#Kan biakinn pawl biaknak laisen ngah dih ding,

#Kokek thilmansung ngunkhuai thenphawtnak covo ngah ding,

#Nuhrin holh in cacawnnak (Mother Tongue Based Education System),

Hi hna pawl hi Phunghrampi remh hau loin le ralkap tihtanh loin tuah khawh dihmi an si. Cucu NLD le USDP cozah an tuan chungah pakhat hmanh an kan tuahpiak (duh) lo. Cu nih an lungput a langhter ko. Cun pi-ne ah teinak a hmumi party kha Vuancichoh pek i cozah serter zong kha poh-mah (261) remh hau loin teinak a hmumi cozah nih nawlpek khawh a si ko. Cucu miphun federal covo a si cumu. NLD cozah nih Rakhine ram ah teinak a hmumi ANP party kha cozah tlaihter khawh a si ko nain a pe duh lo. Tutan cu pi-ne(state) 7 ning tein tlangcung party nih teinak kan hmuh lai i Kawl Party nih federal miphun covo pe loin an kan um ngam/kho lai maw kan test hna lai cu. Tlangcungmi covo pek khawh tuk asi ko nain, pe duh lo riangmang in azeipoh ralkap le Phunghrampi puh (scapegoat) dih hi Kawl Party zia a si.

“(5)Miphun Covo laak tthan dingah hin bochan deuhmi CNLD upa hna nih Chin State Hluttaw MP si ding hi zeiruangahdah papeek ngaiin nan i timh?”

#Lehnak: CNLD nih cuka deuh papek ti theng si loin bawlung team pakhat bantuk in “annih hi hmaikal, annih hi bek, annih hi kawlbawh” tibantuk in CEC nih khaan a thiah(lineup) mi khi a si. NPT khual (အဝေးကွင်း) ah hmaisuang kawlsut dingah mino, ramdang hmuhton/cawnnak a neimi le a chimrel kho bak dingmi pawl Salai Myo Chit, Salai Nhgepi, Salai Van Bawi Lian, Mai Hung Yawng, Mai Nin Lin Htun le Salai Aung Lian tepawl kan chiah hna. Hi paihbual hi Kawl le tlangcungmi dang hna he kum 70 kan icil cangmi si i sau nawn kan inawr rih a hauh caah mino le vawleipi huap chimrel kho hi papek in lineup ah kan chiah hna.

Cun federal mahte-khuakhannak a muru cu mah le faiceukulh(အိမ်ကွင်း) ah mah tein i-uk kha a si caah Chin cozah buantual ah a lut dingin party hruaitu luban hna le cozah/bu hruainak lei hmuhton ngei deuhmi pawl tamdeuh kan chiah hna. Abik in USDP le NLD chan ah kan Chin cozah nih kan Chinram an suaksam tuk caah anmah nak tha deuh in kan tuah khawh timi kha kan mipi hmuhsak kan duh. Eihmuar tam ruangah siseh, rian an thiam lo ruangah siseh, miphun caah an duh a fah lo caah siseh, cozah term hnih chungah dollar billion khat leng cozah phaisa Laitlang a lutmi hi a khurka an kheng lo tuk i a vaivuanmi a tamtuk. Cu lawng si loin cozah nawlngeihnak hmangin ramchung ramleng bawmhnak a lut ding hnga vialte project an siam khawh lo caah kan mipi an sung tuk. Kan Chin zatlang buu, mino buu, media pawl, NGO pawl le private sector pawl zong cozah nih a dirkamh lo caah an tthawng kho lo i miphun sernak hnu kan fual tuk.

Cucaah kawl zong sut khawh, kawl zong kilven khawh dingin lineup tha tein kan suaisammi a si ko. Biahalnak dang tu khi cu zapi theih awk ah a neknawi deuhvak caah pumpak tuin kan i chimruah te lai aw. Kaa lawm.

Upatnak he,

Salai Ceu Bik Thawng

General Secretary

CNLD

Laknak: Van Chan Ceu FACEBOOK

 227 total views,  1 views today

This function has been disabled for Chin 11 News.