US Hrambunh Chin Mipi Hna Zong Ralring Taktak In Um Hna Usih, Buainak Nganpi A Chuak Kho

Tukum 2020 US rampi thimnak cu kumdang nak in thawngpang hi aa dang khun, an konglam hi a rel zong a nuam I khatlei in thinphang ngai zong a si fawn. Buainak a chuak sual lai tiah US ramchung palek pawl zong timcia tein an um ko hna ti a si. Cu ruang ah Chin mi hna zong ralring tein um ko hna usih.

Ralrin nak kong he pehtlai in Victor Khen Sang nih a rak tial mi cu “US election nih mipi buainak ngan ngai chuahter dawh asi cang. Kan nih Canada hna cu Deputy Prime Minister nih US um mi Canadian pawl sin ah ralrinnak achim cang. Lamzawh in motor khangh, dawr baoh, miphun huatnak tiang khan țihnung nih azulh khawh mi asi. US um kan unau pawl, ralring tein um i zuam cio hram uh” tiin a rak tial hi a si.

Tukum thimnak ah hin a tu tiang ah cun a ho nih dah teinak a hmuh lai ti hi chim chung awk a tha rih hrim lo. Atu tiang vote an rel khawh cangmi ahcun Biden nih seat 238 a hmuh i Trump nih seat 213 a hmuh. State pa 7 ah Seat 86 cuh ding a taang rih.

Neveda (seat 6), Wisconsin (seat 10), le Michigan (seat 16) ah hin Biden nih hei tei sual seh law Biden nih seat 270 bak a hmuh hnga i a tei hnga. Nain, Michigan le Wisconsin ah a tei zumh a si lo.

Georgia (seat 16), Pennsylvania (seat 20), Alaska (seat 3) le N Carolina (seat 15) hi cu Trump nih a tei zumh a si i a tei ahcun Trump nih seat 357 hi a hmuh hnga i a sung hnga. Cucaah, state pa 3; Michigan, Wisconsin le Pennsylvania i tamdeuh a ngahmi poh hi teitu ding cu si te dawh an si ko.

Atu dirhmun in cun Biden nih Michigan le Wisconsin ah hin a tei hrimhrim a hau. A tei lo ahcun raltuknak puai a dih si ko.

Michigan ah hin vote 90% an rel cang i Biden nih 49.1% a hmuh, Trump nih 49.4% a hmuh i vote 13,057 hrawng in an i thlau. Ai tei kho veve an si.

Wisconsin zong ah vote 95% an rel csng i an i tluk ngai. Biden nih 49.6% a hmuh i Trump nih 48.9% a hmuh, Biden nih vote 9252 in a thlau. Ai tei kho veve an si.

Pennsylvania hi vote 64% an rel cang i Trump nih 55.8% a hmuh i Biden nih 43.1% a hmuh. Trump nih vote 57, 5023 in a thlau. Cakuat (Mail-in Ballots) in thlakmi hi million 4 hrawng a si i million 1 hrawng an rel rih lo tiah an Governor nih cun a chim. Nain, zeitihmanh in Pennsylvania hi cu Biden nih a tei ṭhan ding zumh a um lo. Hi state vote rel ding kong ah hin cuhkalhnak a um kho i Supreme Court ah zual khawh a herh te men lai tiah lunghrinhnak a um.