US Florida State Thil Cangmi Hi Khrihfa Mit In Zeitindah Kan Zoh Cio!

Sualnak he hawikom ttha tuk an si..Kan Laimi zong tampi an umnak, US ram Florida state, Jacksonville khuapi ah kum 20 a simi nungak nu cu nau a pawi. Hi nu hi a pasal bantuk in umpi cuahmahmi (nupa sualnak tuahpi pengmi) tlangval pali a ngei. Atu a nau pawimi zong hi, cu tlangval pali hna lak i pakhat khat fa cu a si.

A mak tukmi cu, “hi nu nih a hrin dingmi fa hi kan dihlak nih kan fa bantuk in kan zohkhenh dih lai” tiah an ti. Dam tein a chuah ahcun, “ka pa” tiah auh dingmi pali le “ka nu” tiah auh dingmi pakhat; a dihlak panga a ngei lai, tinak a si.

An duhmi nu nih an i duh i nuva dirhmun in an um cuahmah ko lio ah, tlangval dang he a sual zong ah a poi ah an chia lo; nupa sualnak a ka hmanpi ve ko ahcun a za ko, timi ruahnak an ngei dih. Sualnak he an i hawikom tuk hna!

“Ka pasal bik, ka nupi bik” ti zong um hlei ti loin pa nih hmuhmi nu poh sualpi khawh, nu zong nih hmuhmi pa he poh sualti khawh chan chungah kan vawleipi a lut cuahmah cang!  Cucu Pathian hngalhtu thlarau a ngei ve lomi saram nun cu a si ko cang. Kan nupi/pasal nih tlangval/nungak dang an ngeih tikah kan thin a hun khawh rihmi hi kan hngalh loin Pathian ttihnak nun kan rak ngeih tuk rih ruangah an si, ti a hung fiang ngai.

Khah, ka bia sau sual lai. Sualnak he neih niam tuk le hawikom tuk in khua kan sak caah, sualnak cu sual ah kan ruat kho ti hna lo. Huat awk thil zong kan hua kho ti hna lo. Hrial awk thil zong kan hngal kho ti hna lo; kan caah zeizong te hi a palh tukmi, a sual tukmi le ningzah tuk awk thil a um ti lo! Sualnak le fihnung thil tuah kha kan nitin nunphung ah a cang cuahmah cang.

Cucaah “pup” tiah mit hun i au i Pathian caah kan nunzia a si dingmi le atu kan nunning aa keih kawh loning hi kan hmuh fian a herh cang. Sualnak hi kan ral ah kan ruah khawh chung poh cu, kan hrial khawh dih hna lo zongah Pathian lei ttang kan si ko. Sihmangsehlaw sualnak, hrawkhrolnak, lihchimnak, biafak le biachiahru chimnak, nupasualnak le horduhcuainak phunphun he hawikom kan si hnu ahcun, Pathian ral kan si cang! ~Repost Catialtu: Pastor Hram Bik Lian