US Cu Thinphang Ngaingai A Si Cang! A Poi Bak!

US Ithimnak Thlihran Nih US Mithiamsaang Pawl Thin A Phanter Ngaingai Cang! (CHELSEA BAWI)

(US ah a nganbik mi le tanh hlei a ngei lomi USA Today nih a tial mi hi thatein vun rel te a dih tiang in) 1876 lio Election Zaan i buanconak dingah Democratic presidential candidate Samuel Tilden nih electoral vote pakhat te lawng a rak i duh bal. Asinain, Republican candidate Rutherford B. Hayes buan a coter khotu states 4 an lung an i leet thanmi nih hin biahalnak a chuahter.

“Ka tei cang,” tiin an pahnih ning tein tlaang an tlir veve. Cu tikah thla tamial chung khat le khat i alhnialnak a rak chuak phah. President tuanternak kongah biachahnak tuahtu electoral commission ser dingin Congress palai pawl an hneek hna. Party lines zulh in vote an thlak than i, electoral vote pakhat te in Republican candidate Hayes cu buan an coter.

An president an thim a thaikip ah president namhnehnak (inauguration) an tuah colh ve. “Cucu a thalomi a si” tiin University of Southern California ah election law expert Franita Tolson nih a chim. Kum 140 lenglo a rauh hnu ah, US president thimnak tuanbia chungah zoh a chiabik mi tuanbia thalo kha a tutan 2020 election ah vun i khirh than dawhdang in a um cang.

Election he pehtlaiin khat le khat biahri i tirhnak hi tsunami tilian bangin a khat in a khat cang i, Mail-in ballots kongkau i an i alhnialnak a zual chinchin cang caah, November thla chung ko ah hin biahritirh le tazacuainak hi a tam chinchin te lai, tiah Analysts pawl nih an chim. Pulrai nih American mipi 220,000 lenglo a thah hna hnu le bang hin cun, Mail i rinh in vote pek ai timmi milu an karh chinchin cang i, cu thil nih cun zanmangchia bantuk lungretheihnak thil pahnih a chuahpimi a um: Mail in vote pek a si ah cun, an min thut ai khat lo, he ti bantuk tlamtlinlonak tete a um te lai caah, ballot hi a thong a sang in hnonpiak an si te kho mi a si. Cu tikah, election results theih khawhnak dingah lungrethin vansaang a au cuahmahmi kan ram nih hin a zarhzarh rau in hngahngam a hau te kho mi a si.

Lungretheihnak le politics lei ah faaktukin i thenhmalnak meiphu a kautu hi a tu i president a tuan lio mi candidate lila hi a si. Biden cu a hnunglei in heh tiah a thang a chiat i, Mail-in ballots hmangin vote deu tor le cheng a phan chuahmah cang, tiin a tu le tu a chim. Cucaah, anmah conservative nih an i bochanmi Supreme Court nih a tu bantuk i a buaibaimi election hi vun tlaangtlaak lawlaw hna seh, ti a duh cang.

A cang te dingmi thilsining tamdeuh hi cu an tlikzuamnak zeitluk in dah a buaibai, timi kongah ai suu te lai. “Tutan election hi ai phihkhartuk lem lo ah cun, biahritirh le tazacuai hi tamtuk a um theng te lai, ti ka zum lem lo. Asinain, ai phihkhartuk sual belte le, state tampi ah cencikhur cawhpiak hau in raal a tho te lai, ti a ruahchan cio kan hau te ko lai,” tiah University of California Irvine ah election law expert Rick Hansen nih a chim.

Kan ram nih election results a hngah caan hi ni tamial asiloah zarh tamial a rau te kho men. Cucaah, November chung ko ah hin a linsabikmi buaibainak a chuah te lai. Chan khat chung i a buaibaibik mi politics le election nih a kan tlunhnawh cang caah, a sungmi party nih hin an sunghmi hi an cohlan duhlo sual pingpang ah cun, mipi buainak (civil unrest) a chuahpi te lai, tiah Tolson nih a chim.

Cuhlan kan ram tuanbia ah a um bal bak lo mi, thawngpangdeu thanh le thlahnak, mipi buaibainak le cozah duh lo ruang i thatlonak an tuahmi vialte hna nih hin November ah khin kan presidential election hi a khuhvurh dih te lai, tiin kan hnung thla tein khan chief of New Jersey’s Homeland Security Preparedness office Jared Maples nih a chim.

Tutan election a result hi nehnu deuh ah ai fiang kho te lai, ti hi kan ram nih a cohlan zia kan thiam a biapi ngaingai. Kan president kong le a biaka a chiatkhatmi kongah zeihmanh kan tuah khawhmi a um lo. Election Night ah khin kan president mizei a si kan thei kho te lai lo, ti mi lungput a tu tein kan i ngeih khawh a hau, tiah Daniel Mallinson ah public policy prof. Penn State Harrisburg nih a chim.

2020 hi 2000 lio nakin a zualhma deuh lai. Tutan buaibainak nih hin 2000 lio i Florida i thil a cangmi kha a kan theihter. Cu lio ah cun Supreme Court nih ai tluk lakmak mi President Bush le Al Gore kongah biachahnak an tuahpiak hna. Cu bantuk muisam cu tutan kan ram boruah nih a vun ken cang i, catialtu pawl nih 2000 election le 2020 election he an tahchunh ngaingai cang hna. Asinain, hi election pahnih vun tahchunh hi a fawimi cu a si ruam lo – battleground states pawl ah zeitluk in dah khat le khat khingkhang lakmak in an um, timi zoh in, tutan election a hmailei thilsining hi lairel khawh a si te ding khi a si, tiah experts nih an chim.

2000 election hi a umbal theng lo mi thil a si, a ruang cu “Supreme Court nih pei election bia an chah ko cu” tiin mipi lungthin a rak um. 2020 election bia a chahpiak kho dirhmun a dirhmun states pawl i election results pawl belte hi cu Supreme Court nih a tlangtlaakpi khawh ve mi hna a si. Cu ti a si ko ah cun, 2000 election le 2020 election an sining hi vun tahchunh awk an tha ko hnga, tiah Tolson nih a chim.

Nehhnu election he pehtlaiin biachahnak an tuah tikah Supreme Court ai thlaak khawhnak ding a lam a um ve mi cu, candidates 2 an i tluktuk tik caan ah khin a si te lai – swing states pawl ah ballots thong tlawmpal te lawng in an i thlau tikah khin, ai thlaak khawh te lai, tiin Hansen nih a chim.

Asinain, cu bantuk i, i tluktuk lehpek cu a um theng lai lo nain, ralrin hau cu a si thiam ko e, tiah Hansen nih a chim. A tak ram i a cangmi thil hi an i dang ngai fawn (2000 le 2020 tahchunhnak). 2000 ah khan cun, Election Day hnu ah dah ti lo ah cun buaibainak a chuak hraw lo. Florida i sawm hau dirhmun an phaak tiang ah dah ti lo ah cun, a buaimi a um lem lo. 2020 election belte hi cu a buaibai ning ai thuat (deuling) i, Nov. 3 election hnu ni tamial, asiloah zarh tamial a ruah hnu tiangin a caambual kho rih mi a si, tiah Hansen nih a chim.

Rian i Apnak : 2020 candiates pahnih hna hi Gore le Bush hna he an sining an i dang ngai fawn rih. Trump hi hei sung sual sehlaw, election result hi a cohlang kho lai maw, cohlang kho lai lo dah, timi biahalnak faakpiin a um.

Lungdaitein rian apnak tuah a duhlonak kong a tu le tu a aupi bal ko nain, kan hnungzarh i mipi tonnak (town hall meeting) a tuah lio ah khan cun “ka sungh zong le election a result hi thatein ka cohlan ko lai” tiin a chim cang. Asinain, nihin tiang zongah, election a umkalning he pehtlaiin a lunghrinnak lawngte a aupi peng ko rih i, “ballots hi a thong le a sang in hnawmbawm ah an hlonh cang” tiin a chim peng ko rih.

Ballots cheukhat hlonh a si bal taktak ko nain, Trump nih a chim ning rup taimai in cun hlonh an si theng bal lo. October deetka ah khan, New Jersy Mail phurtu nih mail 2,000 lenglo, cun general election ballots 99 lenglo a rak hlonh bal, tiah Justice Department nih a chim. Cun, September ah khan, Pennsylvania ah mail-in ballots 9 an hlonh bal fawn i, cu kong zong cu Justice Department nih an hlat bal.

Cu ti i vote petu nih an thlaakmi ballots vaivonhpiak an tonmi kong thawngpang a than hnu cun, mailbox in vote kuat hi mipi nih an tih phah cang. Tutan zarh chung zongah California ah ballot box pakhat mei in khangh a tong. Vote petu pawl an ning tihter an duh caah a si maw si lo, timi kong fire officials pawl nih hlathlainak an tuah colh. Florida lila ah cun, Republicans pawl nih unofficial ballot drop box cu cheukhat hmunhma ah an thlaak lulh hna i, mail-in ballot kongah lungvaivonhnak a chapter chinchin cang. Hihi cu vote petu pawl an lung vaivonhter an duh bia a si, tiin Democrats lei nih an chim. State officials pawl zong nih cu ti i an thlaakmi box pawl cu cohlan an tim ve lem lo.

“Tutan election hi hnursuan a ton lai ka zum lem lo,” tiin July ah khan the House hmaka bakah Attorney General William Barr nih a chim ko nain, a tu vial ah cun Trump bia i zumh in mail in vote pek hi vote deu a tam kho mi a si i, mei he lente i celh bantuk a si sual lai, tiin a bia a let cang.

Election hnahnawhpek ai timmi paoh cu kan zohsawh hna lai lo, tiin Justice Department nih kum saupi chung an i ngeihmi policy a um i, naitein khan, cu an policy cu an thlen than i, vote deu peknak kongkau tu i hmaithlaak deuh dingin an chaak an i mer cang hna. Election khuacaan chung i an hmuhtheihmi thawngpang paohpaoh email in federal biaceihbawi sinah kuat dingin timhlamhnak kan ngei, tiah tu thla awtka ah khan Justice Department’s Criminal Division an aiawhbiachimtu Matt Lloyd nih a chim.

Election thawngpang he ai pehtlaimi paoh cu hi email hi kuat khawhnak, timhlamhnak, kalpinak dirhmun ai ngeihmi zeibantuk politic minung hmanh an um lo, tiin Lolyd nih a chim.

“Mail in a si ah maw, zei dangdang hmangin a va si pek ah, kan tuanbia chungah hin, a biapimi election hnahnawhpek dingah timhciammaamtein votedeu pek, timi hi a um bal hraw lo,” tiin vote petu pawl an lungretheihnak neemter deuh duh ah, kan hnung thla ah khan FBF Director Christopher Wray nih a chim.

A buaibaimi election, tiin President nih ti lengmang ko hmanh sehlaw, kan US election system kongah Wray le intelligence officials pawl zumhfehnak an ngei peng ko rih. Kan election hnahnawhpek dingin ramdangmi nih thawngpang diklo heh tiah thlah an si zuam peng ko nain, vote tamtuk lawmmaam vaivonhter in kan election vun hnursuan ding cu a harsa ngaimi thil a si, tiin officials pawl nih an chim.

Biatakte i an i phomhnak ding hmun cu Pennsylvania hi a si te lai. State tampi ah cun khuami, state le federal tiang cuul in tazacuai lawng te ai thok cang. Asinain, Pennsylvania tlukin tazacuai, biahritirh a tamnak state hi a um te lai lo, tiah experts nih an chim. Hi state hi 2016 lio ah Trump vote 44,000 (0.7%) te lawng a hmuhnak a si. Hi state chung i a tutiang i poll an tuahmi tampi ah cun Biden nih Trump hi a hlaih ngaingai, ti a si.

Pennsylvania hi tazacuai a phunphun a um pengnak hmunlipi a si i, biasu pakhat le bang cu Supreme Court tiangin an phaakpi bal cang. Monday ah khan, Election Day a dih hnu ni 3 tiang zongah ballots rel rih dingin high court nih Pennsylvania cu an onh. Pennsylvania ah mail-in ballot khap dingin saduh a thattu Trump caah zatlak taktak a si. Cu biachahnak (onhnak) cu Michigan, North Carolina, Wisconsin le Minnesota, hei ti bantuk a dang state tampi zong nih an vun i hman chin khawh ve mi a si. Mail-in ballot thlak ding ni le thla kong hi cu state pawl ah cun biaceihzung nih biataktein an ceihmi a si.

Pennsylvania ah hin, 2016 lio bantuk in candidates 2 an i tluktuk sual ah cun, buaibainak tampi a um kho mi a si. Tutan election hi a buaibaituk ko zongah, Pennsylvania hi cu mail-in ballot pek lawng ai ziakmi a si, tiah Millinson nih a chim.

Daithlanhmi Ballots : Election Day i a buai te dingmi thil pakhat a si mi cu, a cabawn chung i an vote an khumh tikah thatein cabawm seng ta lo in box chungah an thlaakmi nih hin vote petu pawl a vaivonh dih te hna lai. June lio ah khan, vote petu za tamial nih an cabawm thitha in an seng lo, ti a si. Philadelphia hei ti bantuk a cheukhat counties belte nih cun ‘daithlanhmi (naked) ballots cu an cohlanpiak thiamthiam hna nain, a cheukaht states nih cun an hnonpiak hna.

Daithlanhmi ballots paoh cu hnonpiak an si ko lai, tiin September ah khan Pennsylvania Supreme Court nih biachahnak a tuah. Cu ti biachahnak a tuahmi nih cun battleground states lakah ai telvemi a si bangin, a minung a thong a sang hnan i an vote thlakmi pei hnon an ton ko ne lai hi, tiin election officials karlak ah lungretheihnak a chuahter. Cu tikah, Pennsylvania i mail-in ballot na pek tikah, hi ti hin na tuah lai, tiin Democrats pawl nih digital ads in cawnpiaknak ngeihpiak hna dingin baichahnak an tuah chih.

“Cu lawng cun a za ne lai maw? Vote pek ningcang a vaivonhter chin tu phung na ser, na hman tik paoh ah, mipi sinin vote pek khawhnak covo na chuh hna bantuk a si. Hi kongah mipi hi anmah tein maw vote pek khawhnak covo hi an i laakkanh le maw?” tiin Mallison nih a chim.

Vote thlaknak cabawm ah thatein vote khumh i sengh ding, timi kongah tuanvo lak dingin September chuahmi capar hmangin chairwoman of the Philadelphia city commissioners Lisa Deeley nih state police pawl thazaang a pek hna. “November ah khin cun, vote cabawm zeiti maw tlawmte ai rawksawnmi ruangah hnon a tong te dingmi vote hi 100,000 lengkai a phan te lai, tiah Deeley nih chimchungnak a tuah.

Kan election a buaibaitertu ding hi zeidang a si theng lo, daithlanhmi ballot kongkau hi phung le phai an sermi hi a si te lai, tiah Deeley, Democrat, nih a tial.

Key swing states pawl ah thalo in an tlolhmi thil (delays) a um te kho mi a si. Mail-in ballots hi tutan election ko ah hin a tambik ding a si caah, mail-in ballots pawl a hlankan in tawlrelnak tuah dingin khuachung election workers pawl cu Michigan, Iowa le New Hampshire hei ti bantuk swing states pawl a tu tein rian an fial cang hna. Election ai duh nikhat asiloah ni tlawmpal hrawng ai duh in cun Box pawl vun on, cabawm pawl thatein remh, min pawl thatein zohfel dingin nawl an pek hna. North Carolina, Florida le Ohio le bang ah cun ballots bihzoh, kilvennak rian an thok diam cang.

Pennsylvania le Wisconsin belte nih cun local election workers pawl an cawlcanghter rih hna lo. Pennsylvania le bangah cun, Nov. 3 zinglei 7 hlan paoh cu a hlankan ballot zohnak hi an tuah lai lo, ti a si. Cu ti hna a si tak ah cun, election results caah nikhua an dindenter viar khawh men hna.

State Democrats le Republicans nih cun tuantein a hlankan in ballots bihzoh, tawlrelnak tuah dingin local election workers pawl nawlpek dingin lungtlinnak an ngei cang. Asinain, cu ti rian thoknak dingah riantuantu zeizah dah kan pek hna lai, timi kongah bia an i thla kho rih hna lo.

Election hlan ah ni 20 caan laak in tuan hna seh law a tha, tiin Gov. Tom Wolf le Democrats an duhnak an chim. Republicans lei nih cun ni 3 te lawng tuan caan siseh, tiin an ti ko nain, Democrats lei nih an duh lo. Drop box pawl hi tutan phung an sermi nih hnonpiak ai timh caah an duh lo nak hi a si.

Philadelphia bantuk county ah hin cun, ballots box on dingah ni tamial a rau lai. Election Night ah hin buan a cotu hi American mipi nih a theih kan i ngaih tawnmi a si. Fiangtein le tuantein ballot rel khawhnak dingah Pennsylvania hi ai tuaitam ngaingai, tiah Millinson nih a chim.

Chelsea Bawi