US Covid-19 Update: 04/11//2020 Ah Vawlei Cung Dirhmun Le US Dirhmun

Hmaizarh April 14 ni khi asang bikmi peak kan phan lai tiah White House coronavirus task force nih an ruahdamh nain US mipi nih social distancing tha tein an zulh caah peak date kha an thlen i tuchun hi a sang bikmi peak date kha a si. Hmaizarh lei cu a thimi, a zawmi an zor lei an pamh cang lai tinak a si.

Tuchun tiangah a thimi, minung 18761 an phan. Nizan lawngah a thimi minung 2484 an si. Nikhat chungah a thimi an tam bik ni a si. A zawmi 503177 an phan. Nizan lawngah a zawmi minung 48873 an i chap. A zawmi cazin a tam bik ni kan phan. Tutiang ah zawtnak a chek cangmi hi 2 million hrawng an si cang. A dam than cangmi 27314 an si. Nizan lawgah a dam thanmi minung 2352 renglo an i chap ve. A dammi zong an karh chin lengmang ve. Athi mi a tam deuh hi minak pawl an si. A pahnihnak ah mirang, a pathumnak ah miphundang an si. A thimi tam deuh hi zawtnak dang a ngeih chihmi a tam deuh an si.

White House Coroanvirus Task Force nih nizan press conference an tuahmi ah social distancing felfai tein US mipi nih an zulh caah May thla ni 1 thawk in US business pawl kan on than khawh lai tiah an chim. Asinain President Trump nih zawtnak lei thiamsang hna nih ruahnak pekmi chung in biachahnak ka tuah lai a ti. Mah biachahnak ka tuah dingmi hi ka chan chungah a har bikmi a si lai a ti.

CDC lutlai nih a chimi cu coronavirus ruangah a zaw i a dam thanmi hna zong riantuannak nawl pek than an si lai tiah a chim. Cozah nih minung pakhat ah $1200 le fa pakhat ah $500 chap dingmi bawmhnak cu hmaizarh chungah nan bank ah direct deposit in kuat hram an thawk cang. Hmaizarh ahcun nan bank account ah a lut cang lai tiah zumh a si. Asinain mail in kuat dingmi pawl cu April 24 hnu lawngah kut khawh an si lai tiah an chim. White house coroanavirus task force nih an tuakning ah August thla ni 4 tiang ah khin, a thimi dihlak minung 81,766 kan phan kho tiah an ruahdamh. Tuan deuh i an tuakning ahcun minung 100000 in 240000 tiang kan thi kho tiah an rak chim. Asinain President Trump nih thimi thong 80 cung an kai lai lo tiah a ruahnak a chim.

Vawleicung ah zawtnak ngeimi tam bik cu US a si. A zual bikmi khua cu New York a si i, minung ah 8744 an thi. Nizan lawngah New York khua ah minung 1677 an thi. Nizan kha nikhat chungah a thimi an tam bik ni a si.

Mizaw zohkhentu hna doctor le nurse pawl hi atu lio ahcun ralkap nak in bochan deuhmi an si. US mipi himnak caah ral a tumi an si. US rampi chung a zawmi le a thimi, 50% cu New York khuami an si. New York hi vawleicung khualtlawng a tam biknak khua a si caah a zual khunnak a si an ti. Covid-19 ruangah US ah rian ngei lomi million 17 renglo an si cang. A thimi tam bikmi ram cu US, pahnih nak Italy pathumnak ah Spian, palinak ah France a si. A rauh hlan ah US nih a lonh dih te hna lai tiah ruah a si.

Credit: Salai Lairamthang

 411 total views,  1 views today

This function has been disabled for Chin 11 News.