US Ah A Um Mi Chin Mi Cu Ralrin Deuh Kan Herh Rih Ko

Iralrin rih ko hna usih

Texas ramkulh uktu Greg Abbott nih uknak lei nawlbia (order) GA-18 a chuahmi bantukin tuni thawkin Texas ramkulh cu an on than cang. Rawl eidinnak dawr pawl zong nih nawl pekmi zat i 25% zat lawngin rawl dawr ah luhchuahnak nawl pek an si ve.

Hi Covid-19 zawtnak hi a dih nai rih lo caah iralrin thiam kan hau rih. Abikin kan Chin Community hi iralrin thiam lo ahcun fak deuh ngai in a kan denkhon kho rih. Mitfak zawtnak (pink eye) nih kan community chungah minung pakhat khat a tlunh tik hmanh ah fawi ngai in pakhat le pakhat kan i chawnh tawn tikah Covid-19 zawtnak chinchap hi cu fak tukin a kan denkhon kho. Cucaah iralrin thiam hi ahleice in kan hau khun.

Texas ramkulh cu on hna hmanh sehlaw zawtnak a tlau hrim rih lo. A tam tuk rih.

Kan humhimnak caah tuah hrim awk phun (7)

(1) Rawl le dinmi cah i mawtawka mongh lak i kal ( to-go tuah) , thil paohpoah asi khawh chungin cahmi va lak, siloah inn ah rak pek dingin tuah ding. Rawl ei awk cawk tikah asi khawh chungin an onka zinglei sang ah cawk khawh izuam ding.

(2) Atu le atu tongh deuhmi thilri le hmun pawl kha ( kutka tlaihnak, cabuai, thutdan, mawtawka kutka tlaihnak tibantuk) thianh le zawtnak rungrul a um lo nakhnga a caan hman tein tuah ding.

(3) Gas dawr kal tikah plastic kuthruk ihruk ding, gas rawn dih hnu ah an hmunthur hlonhnak ah thlonh ta ding.

(4) Kut thian lomi in hmai, hnar, kaa i tham/tongh lo ding. A herh lo ah a leng chuah tuk lo ding le milengkai tuk rih lo ding.

(5) A leng chuah paoh ah hmaihuh i huh ding. A leng chuah tikah zapizarang tham mi siloah tlaih deuh mi kutka, thilri pawl a si khawh chungin tongh lo ding.

(6) Khuh khuh tik paoh le hachio paoh ah ban in ihuh hnu lawngah khuh khuh ding le hachio ding

(7) Hi zawtnak phun pawl nan takpum cungah a langh ahcun siibawi he ipiah colh ding siloah inn ah ierh colh ding: khuh khuh, thawtnak le rim theih lo, hromfak,chungtlik , thawchuah harh , taklinh 100.00 dikkari ( degrees fahreneit), kihnak (khausik), khuasik ther than lengmang, taksa fak, lufak.

Source: Lewisville Chin Thawngpang Buk

 163 total views,  1 views today

This function has been disabled for Chin 11 News.