Uniform/Party Khat In Dawpdolhnak

Ralkap thuam AHRING “One Uniform” in “Union Army” ti in a chungah tlukruannak um loin miphun pakhat (asiloah minung pakhat) nih uktlaihnak hmunhma laak dihnak tinh ciammammi system he hramhram in miphun sinak cawl kho loin hreengkhih kan rak tong.

Kawl Miphun sinak hmelchunh caah rak sermi vate (awtaw) muicuang kha an Party hmelchunh ah hmang in ASEN “One Uniform” in “Union Party” ti in a chungah tlukruannak um loin miphun pakhat (asiloah minung pakhat) nih uktlaihmi system tang ah mah duhthimnak he lut in miphun sinak cawl kho loin hreengkhih kan hung tong ṭhan (rih lai).

Meithal cu meithal he dir-onh lawng ah tlukruannak sining limhang, huham le rumra, le hosinak cohlannak he biakchawnh le nawlngeihnak nawr nakding lam a chuak ding a si. Cu ruangah miphun in duhthimnak tampi lakah hriam tlaih a herh phahnak a hung si.

Miphun zacawh in dirhmi ramkawmh Political Party zong ah Party ve in i dir-onh lawng ah miphun pakhat le pakhat kar sining limhang, huham le rumra, le hosinak vialte tlukruang tein a tak ah i cohlan khawh le miphun sinak i venhim khawh ding nawlngeihnak nawr nakding dirhmun phanh khawh ding khi a si. Cu ruangah miphun in duhthimnak tampi lakah Miphun Party dirh a herh phahnak a hung a si ve.

Ahring muici “One Uniform” in dawpdolhnak cu an caah a ṭha nain kan caah a ṭha vemi le a him vemi a si kho lo i nihin tiang daihnak a um lo.

Asen muici “One Uniform” in dawpdolhnak zong an caah a ṭha nain kan caah a ṭha dih vemi le a him vemi a si kho hlei ding a si lo nain; a donghnak caah (miphun pakhat, biaknak pakhat, nunphung pakhat, le Party pakhat) in “One Uniform” i hrawm dih lawlaw a pom (rih lo) nain sonhtarhmi thil tete ngeih in atu te ah miphun in cu (miphun dawpdolh le khuhchilh) dirhmun phanh khawh zaunak hramsih a bawmtu dirhmun i thim a herh chung ko tiah a ruatmi zong cu hung um a si ve.

A dik le a palh ti ngaingai a um thiam lai lo nain sunhsakmi le manngeih termi thil ah hmasa le hmanung chiahmi nih a ngeih ruangah a si ko lai.

Miphun in i dawpdolh ningcang in i hlipphuahnak lam khel zokzok maw a ṭha deuh hnga asiloah zeizong ah “One Uniform” tang ah um zungzal ko cu dah a ṭhat deuh ko hnga timi pom ning cio kha a donghnak laireltu an si tawn ko (lai). Deilei hngilh khawh lo khuaruah…! Credit:

Thong Za Tawng
14 Nov. 2020