UN Nih NUG Cozah In Cohlang In SAC Ralhrang Cozah Cu Hnuchit Taktak A Timh Ko Cang Rua

September 14 ah UN General Assembly meeting pi cu tuah a si cang lai. Hi UN Meeting ahhin UN chungtel ram hna cohlannak kong ruatkhangtu Credential Committee nih Myanmar ram aiawhtu cozah ah State Administration Council (SAC) maw cohlan a si lai, National Unity Government (NUG) dah cohlan a si lai timi biakhiahnak an tuah lai.

UN nih Myanmar ram aiawhtu cozah ah cohlan an si khawh nakhnga SAC nih siseh NUG nih siseh a si khawh chungin an i zuam veve. Asinain Special Advisory Council for Myanmar (SAC-M) nih “UN nih NUG hi a cohlan deuh lai” tiah cathanh an chuah. SAC-M hi vawleicung huap thiamsang hna nih dirhmi a si pinah a luancia i UN chungtel cohlannak kong vialte le UN zulhphung hna kha tha tein an zoh hnuah an zumhning cathanh an chuahmi a si caah zumh a um ngaimi a si.

SAC-M a dirhtu le UN nih Myanmar ah palai a rak thlah balmi Yang Hee Lee nih cun “A rauh hlanah tuah dingmi UN general assembly meeting ah Myanmar ram aiawtu kongah biakhiahnak tuah a si lai.

Hi kong he pehtlai in kanmah SAC-M nih hlathlainak kan tuahmi cathanh zong kan chuah cang. Ralhrangbu nih a thlahmi palai kha Myanmar mipi aiawhtu ah cohlan a si ahcun UN zulhphungpi kha a dihlak in an buar tinak a si hnga. Asinain kan ruah lo ning zongin thil a cang kho mi a si ko” tiah a chim.

SAC-M nih cathanh an chuahmi ah September 14 i UN meeting ah a si kho dingmi biakhiahnak phun 4 an laughter. Pakhatnak: Myanmar ram aiawhtu ah NUG cozah cohlan, Pahnihnak: Ralhrang cozah cohlan, Pathumnak: U Kyaw Moe Tun hi UN ah Myanmar palai in chiah rih i cozah pakhat cohlan ding kong cu a hnu ah ceih than, Palinak: Myanmar aiawhtu palai chia lon um! Hi phunli chungah NUG cozah cohlan ding le U Kyaw Moe Tun cu UN ah Myanmar palai in chiah ding timi hi a si kho bikmi a si tiah SAC-M nih cun cathanh ah an tial.

UN nih NUG hi a cohlan ahcun UN tang i a ummi United Nation Human Right Council (UNHRC), World Food Programe (WFP), World Health Organization (WHO), International Labour Organization (ILO) le International Criminal Court (ICC) ah direct in chungtel an si colh lai.TCP

 

Be the first to comment

Leave a Reply

Your email address will not be published.


*