Uico Ralkap Uknak Riantuan Sawmnak!

Ralkap Uknak Rianțuan Sawmnak

Kawl ralkap lutlai hruaitu pawl nih duhsah tein an nawlngeihnak (Power) hi vun fehter chin lengmang an i zuam cang i arauh hlan ah mi kip kha an rianțuan pi dingin avun sawm cang hna lai.

Minung hi aho paoh kan si ah kanmah nih kan chim mi dirhmun ah kan dir ngam lo mi le kan tuah ngam lo ding mi kha midang va chimh hna i tuah uh hei ti phun hi adik lomi thil asi i cucu “Mi kut rul tlaih” kan timi cu asi. Cucaah na tuah bak ding, na dirpi hrim ve ding lawng kha chim ve ah ațha.

Kawlram hi Mirang (British Empire) uknak tang ah arak um lio ah hin Mirang pawl nih Kawl miphun kha rian sang an pek hna i anmah lila kha Kawl pawl uktu ah an rak hman hna.

General Aung San nih achim mi cu; “Mirang uknak tang ah cozah rianțuan si cu rian ngan deuh atlai mi paoh kha sal ngan deuh kan si ko” arak ti. Cucaah tutan Min Aung Hlaing te nih mipi an kan thahnak thisen an kut i ai neh buin rian țuan an sawm i a cohlang mi hna cu sualnak ngei lo mipi an thah mi hna thisen adin pi ve mi hna an si tinak asi.

Cucaah hi ralkap sermi SAC uknak tang ah rian khinh mi cu cohlan hrimhrim lo ah ațha bik. CDM lut lomi cozah rianțuan pawl dirhmun he zong ai khat lo. Hihi cu athar bak in mipi an thah hna hnu ah uknak tlaih khi asi i an thah mi hna thisen din pi ding in sawm khi asi.

Cun hramhram in luhter zong asi lo i sawm mi dirhmun an si ko caah duhthimnak nawl an ngei. An duh lawng ah luh ding asi ko caah hi rian cu ka duh ko, ka lut ko lai atimi lawng luh ding asi. Khrifa asimi Chin miphun kokek asi ko mi nih cun luh ding rian ah ka ruat hrimhrim lo.

Kan Chinram le Chin miphun caah zei atuah kho lomi kan va si hmanh ah kan ram le miphun rawiphirtu (Traitor) cu si hram hna hlah usih. Hi rianțuan sawm cu ram le miphun rawiphirtu țuan sawm kha asi ko. Meithal lawng hi mithat tu asi lo, hi bantuk rianțuan pi tu va si ve hi mithat tu hriamnam hmangtu ah itel ve cu asi.

Victor Khen Sang
April 12, 2021