U Kyaw Moe Tun Myanmar ah Kuat ding in SAC nih US Ca a Kuat!

Myanmar ram aiawh UN palai a simi U Kyaw Moe Tun cu Myanmar ram ah rak kuat ding in SAC nih US sin ca a kuat, tiah theih a si. U Kyaw Moe Tun cu UN ah Myanmar ram a aiawhtu (Permanent Representative) a si i, SAC nih uknak an ramh hnu ah UN ah SAC aiawh loin Myanmar mipi ca ah ralttha tein bia a rak chimmi a si.

SAC nih US sin ah ca a kuatmi ah, “U Kyaw Moe Tun hi Myanmar aiawhtu UN palai ah cohlan lo ding in le Myanmar ram ah biaceih khawh a si nakhnga a umnak ram nawlngeitu nih rak kirter u,” tiah an telh.

U Kyaw Moe Tun Myanmar ah rak kuat ding in SAC nih US sin ah ca a kuatnak kong cu nihin July 13 ah SAC ramleng vuanci zung nih thawng a chuah. SAC nih U Kyaw Moe Tun cu UN palai ah cohlan lo ding in an doh len nain UN nih U Kyaw Moe Tun hi atu tiang Myanmar aiawhtu palai ah a cohlan pengmi a si. Credit: The Chin Journal