Twitter Le Facebook Nih Vom Rengh Viva An Timh Cu US Caah Hnathiang Ngai A Si

Amah tappi kauh hrawng lawng a cuan khotu Vom nih vawlei ram ṭhawng bik hruaitu aa chuah tikah, an mual a pho. Ramkip nih an nihsawh i capo ah an saih. Coronavirus nih a ram a tlunh tuk i Dems pawl a puh hna. A puh cawk ti hna lo i China ah aa ṭhial. Cuti aa ṭhialnak zong cu Dems sualphawt duh thotho ah a si.

US Dems le China nih ram hruaitu si ding an ka duh lo, a ti huar. A hnuzul pawl a molhter dih hna. An mit fiangin hmuhnak a pe kho hna lo. A ram chungah buainak nih a tlunh hoi. A zualhma chinchin. EU upa pawl nih “dawhcah deuh in” tiah an von forhfial. EU lakah cung cuang todanh a co tawntu US cu EU nihcun an von cawnpiak.

EU chimlo, Kawlram hmanh nih cawnpiak ai huah. Kawlram tehna i human rights kong le Palik rian kongkau i ai rak ithlak khomi US cu Vom chan hnu cun, zei dirhmun dah an phanh? An von tlangtlak ko hna khah! BBC ah rel uh!

Zoh an chia. Korea tar kereuh, anmah Korea thawngpang le news lawng a rel/ngai kho, hmanh nih “mihrut, mi ṭhalo, Sincheon-ji biaknak bantuk hruaitu” an ti mei. Sincheon-ji khrihfabu cu pialsual an si i Korea ram coronavirus tamcem a luhpitu phu an si.

Trump thluak nihcun Tuluk zong raltuk ah a tei lai lo. Tuluk miphun cu Jesuh chuah hlanpi in “The Arts of War” timi raltuk thiamnak cauk a rak ngei cangmi miphun an si. Zei tluk an hriamnam ṭhat zongah hruaitu thluak ṭhalo nihcun thluak ṭha Tuluk a teinak ding um lo. Cu tlukcun US timipi cu a chiat chuah.

A hmurka a chiatkhat tuk ruangah anmah ram hruaitu bak si ko na rawraw in Twitter nih a rengh. US sihni phu pawl nih Facebook cu an pu Vom rengh le kham lo ruangah an rak mawhchiah ngai cang kha mu. Facebook nih a celh ti lo. An rengh deuh ve cang lai. Cucu US ram le a rammi caah thil ṭha a si. US president timi pi Twitter le Facebook renghmi si cu zoh ai dawh bak ko, a ti rihmi cu an hruh bia si loin an pial bia si cuh.  Mipial cu cawnpiak khawh an si lo. An mit khin ai thei tiah Lai pastor pakhat nihcun a rak chim. Tulio White House chimnak nawlngei nu khi mipial mit ai aumi cu a si.

George Floyd buainak hraang khun in mi tawsawhtu taktak an theih cang hoi hna. White Supremacists timi Vunrang Sunparcuh pawl an si. Vom he eem khat pawl. Vom nih a hnulei kuttum ca phun ah aa ruahmi pawl an si. Bia a von ingerh ngawi pah. A tlangtar lei von lanh ah cun. An pu ram a buai tuk ah cun, Thimnak tuah loin an pu nih uknak a duhchung in aa tlaih te khawh. Cucu, ruahdamh in chimmi si lo i, mifimthiam hna an rak ruahning te khi si. Buainak ruang i uknak ai hum ahcun, caan zeizat chung dah power aa hum te lai chim khawh si ti lo. Absolute power a ngei cang lai.

Cu tikah, Ram le miphun thianh a duhtu pa nih zeidah a tuah te lai? Chim hau lo si ko. Atu lio i a ṭanh cem, ai molhpimi Lai pawl vialte, a ṭanh lotu pawl he “chuak uh” a ti te khawh. Lai theng cu maw? Si hlah e. Lai hna cu chimtlak milu an um lo. Asian lei pawl vialte dawi dih khawh a si. Minak tu cu an cii zong maw an hmih dih te hna, chim khawh si lo.

Cucu a pakhatnak ah a cang te khomi thil a si. A pahnihnak ah a cang kho dingmi thil ah cun: 2020 Thimnak lam ah cun, a tleu tengteng lai, a fiang ko. A tleu tikah khin, buainak chuahpitu si te lai. Dems pawl nih lih an ṭawn. Thimfung an fir a ti te hna lai. Vunrang Sunparcuh pawl aa roih hna lai i Breitbart theorist tepawl nih an von tukforh hna ahcun, khuaci an mui thotho lai. Khi tikah, US ram chung cu a buai kho taktak ding si ṭhiamṭhiam.

Naa tein Twitter nih an phih tikah, a duhning in sualnak a hrihhawh kho ti lai lo. Facebook nih a khar hnik tikah, hlan bantuk in lih a pharh kho tuk ti lai lo. Mi a tukforh kho tuk ti lai lo. OANN ti phun media a dirhter hnikmi hna le zei huaha an si lo. An website khi zoh ko uh. Riahbuk an tluk khawh dingah cun tampi an iduh rih khih!

A ra laimi US buaibai ding vialte Twitter le Facebook nih ready in an rak i um cia cu US ram le an rammi caah thilṭha a si. Fox News nihcun an ṭanh leen rih ko hmanh ah, a chiathrut tuk cang tikah cun, an dirpi te lai lo. Nai hmanh ah khan an irem huaha ti hna lo kha. Raifanh-sii kong in ai thawk rua ka ti. Media pawl i Bunker Boy “Khurchung Thup Ngakchia Pa” an timi nih US a hruai leen khawh lonak ding, hlenfawi Khrihfa mama ei pawl Satan kuttang in an luat khawhnak dingah Facebook le Twitter cu santlaih te dawh an si.

Catialtu: Sailai C Alexander

 188 total views,  1 views today

This function has been disabled for Chin 11 News.