Tuzing US Election Tuzing Dirhmun! Trump Nih A Tei Rih

US Election-Tui Zing Dinhmun (12.11.2020)

Tu hi Media-pawl chhehle(manipulate)nak tel lo cun EV 270 hmuh ṭul mi ah Trump 232 -227 Biden a si. Trump in N. Carolina 15 le Alaska 3 a lakbet ruangah 232 ah a hung kai. Khat lamah A cem hrih lo mi Pennsylvenia, Georgia le Arizona khal Biden lamah ret a si hrih lo. Cuhleiah Michigan le Wisconsin khal siarsal rero zo.

Michigan ih Antrim County ih vote 6000 amahten Trump ihsin Biden lamah a rak ṭhawn pang ti a si. Khavek deuh kha Congress zuamawknak ah a mal bik hmun 2 hrawngah Republican lam ta Dems lamah a ṭhawnaw. A hmusuak ih retṭhatsal a si. A mak zet mi cu Software ruangih khati ṭhawnaw sual ngai a si ahcun Dem lam ta kha GOP lamah ṭhawnaw tla um ve ding a si nan pakhat hman a um lo.

Connecticut GOP House Rep. Craig Fishbein khal an record lo mi Polling Station phakhat vote an hmuhsal ruangah Dem lam a tling tiih an than zo hnuah nehnak a co-sal.

Georgia ih vote million 6 lenglo cu kut thawn rori an siarsal ding ti Georgia Secretary oh State in a phuang.

Federal Election Commission chairman Trey Trainer cun, “Keimai bulpak ngaidan cun tui ṭumih hrilawknak cu Pennsylvenia thil cang mi ka hmuh tikah danlo (illegitimate) a si” a ti timi thegoptime.com ah tarlang a si. Hi hi FEC thuthan cu a si lo, amai ngaidan men a si. Media dangah cun hmuh ding a um hrih lo. Asinan Pennsylvenia hrilawknak result cu tidanglam a si zum lo media le milar tampi an um ve ko.

Trump cun a Defense Secretary Mark Espar cu a hlawn. A can cu September thla ih uk thei lo khawpih buainak khawpi hrekkhat ih a suah laiah Trump in ralkap ret a tum cu a dodal thu media ih a rel ruangah a si zum a si. GOP Chairwoman hrangah tu ih ṭuan lai, Mitt Romney ih tunu Ronna MgDaniel a support thu Trump in a ngan

Indiana AG Curtis Hill khal Supreme Court ih thu pulut dingin AG dang a zawm ve. Tu hi Senate ah GOP 50-48 Dem an si ih Georgia Senate pahnih Jan 5 ah Runoff neihsal ding an neisal ding. Hi hmun 2 hi GOP lam ṭhatcianak a si ruangah Senate an control ah cun Biden rak tling ta khal sehla thil fehdan tampi a tidanglam thei cuang lo ding. House ah khal naute thah duhlo GOP nunau 13 rori in an bet ding. Dem lam an tamsawn lai thotho nan boruak a danglam deuh ding.

Culaiah china, Russia, Japan, Brazil, Chez, Polland, India, Mexico tivek telin ram 192 sungah ram 170 lenglo ram hruaitupawl cun Biden lawmpi cu a tuan tuk lai an ti. Asinan liberal ram- France, Canada, Germany, UK, EU, NATO, Fuji, New Zealand pawl cun an lawmpi ve. US Intelligence khalin President-elct briefings an neih ṭheu miah Biden luh an siang hrih lo.

Trump amai lungruh ruangih duai duh lo a si lo. GOP mipi, milar le mizahum tampi in duai mai lo ding le a tawp tiang bei dingin an ngen ih an dinpi ruangah a tel. Ziang tak bang vivo kei maw…? Kan thlir vivo hrih lai ding.

Lal Lian Zual
Naypyitaw