Tuzaan VP Debate Cu Zeidah A Lawh? Anmah Pahnih Bak Hi Pei US President Ah Thim Hna Ding An Si Hi

White House nih virus a tawlrel khawh lo ruang i President le a dang a artlanglai minung a sawm in a tlunh hna hnu in cun, Trump a cozah nih Coronavirus a tawlrelnak he pehtlaiin Wednesday i US VP debate tuah an thok le cangka VP Mike Pence le Democractic challenger Kamala Harris cu an i tlir lekmak colh ko.

Kan hnung zarh presidential debate ah khan khat le khat i ralchanh a faak ngai cang i, tutan VP debate zongah Harris nih healthcare in economy lei tiang, climate change in foriegn policy lei tiang, tlangtar ai ser hna i a vun phomh than rih hna. Kum 4 chung i Republican cozah nih a serchuahmi record pawl cu Pence nih a si khawh cungin kilven ai tim ve.

Kan ram tuanbia chung vialte ah zeibantuk president hruainak hi dah a chaikhabik, timi cu American mipi kan mithmuh a si, tiin Salt Lake City i University of Utah i debate an thok le cangka Harris nih a chim.

Pulrai dohnak i US cozah nih thazaang kan chuahmi lengluang hi zoh ko ngat. China in ai thokmi pulrai ra lo dingin January tein khan pei Trump nih Travel Ban a tuah ko kha, tiin Pence nih i runvennak ai tuah.

President Trump hi president a tuan a ni khatnak tein khan America hi a pakhatnak ah a chiatu a si, ti hi American mipi nih nan theih dih awkah ka duh, tiin Pence nih a chim.

VP candidates cu pee 12 hlaat in an dirter veve hna i, Plexiglass in an khamkanh rih hna. Cu ti kilvennak an tuahmi nih cun “pulrai nih American mipi 210,000 a thah cang hna, economy zong a hrawh dih” timi langhternak dingah a si.

Harris nih cun cuhlan i VP debate an rak tuan tawn ning phung ai hmanh i, Trump a cozah nih Obama Care hrawh a duh caah le, president dirhmun in kum khat ah federal income tax a pek mi hi $750 lawng a si, caah Trump a cozah cu ngepngap tiah a vun zuamhnawh colh taktak.

NT Times nih hlathlainak an tuahmi avoikhatnak ka theih ah hin, “$750,000” na ti duhnak a si lo maw?” ti tiangin ka rak ti phah bal. Nemmam cu, $750 lawng a rak si diam, tiin Harris nih a chim.

TAX Kong i Alnak

Harris vun leh duh ah Pence cu economy le tax policy kong lei ah a vun i mer. Ni khatkhat ah cun, Joe Biden nih a na tax pek hi a karhter te lai, tiin Pence nih a leh. Kum khat ah $400,000 nak tlawmdeuh lawng a hmuhmi hna an cungah Biden nih tax hi a karhter lai lo, tiin Harris nih a leh.

Biden nih cun zinaan cawhnak rian hi a kham (ban) lai i Green New Deal tu hi ai pom te lai. Hi GND hi libral democrats pawl nih biatakthlaak in nan dirpi mi a si, tiin Pence nih a chim.

Wednesday debate an tuahmi kha USA Today journalist Susan page nih moderator a tuanpiak hna i, pulrai kong le pulrai nih a chuahtermi kan economy a tlakchiatnak kong hi a linsabikmi biasu cu an si, tiin a langhter.

Covid khamnaksi kongkau Harris an hal i, “A liamcia caan chung i cohlannak tuah lo mi (prove) siai hman dingin a dirpitu Trump a biachimmi nakin scientists pawl an biachimmi tu hi ka zumhdeuh lai” tiin Harris nih lehnak a tuah.

Dinei khawh a si ko, tiin doctors pawl nih an kan chimh ah cun, sii din dingah a hmasabik ah ka vai tlar lehlam la. Sidin dingin Trump nih a kan ti ah cun, kei cu a ka ding bak lai lo, tiin Harris nih a leh.

Khamnaksi an ser kongah mipi an zumhnak pei na hrawh dih ko ne hi, tiin Pence nih Harris leh a vun phomh colh ve.

Cu bantuk biachim cu lungfim lo bia a si. Mipi nunnak kongah politics hi kan i celhpi (play) awk a si lo, tiin Pence nih a leh.

Miphun kong hi Ruahphu a si cang

Harris hi minak (black) nunau chungin party ngan pakhat nih VP ca i an thimmi vialte lakah a hmasabik a si. Miphun kongkau i biasu he pehtlaiin Harris nih Pence cu a phomh i, kan hnung zarh i Biden he debate tuah lio ah khan Trump nih vunrang pawl an biapithleinak (White Supremacy) hlonhnak caantha ai ngeih ko nain, a hlonh duh bak lo, tiin Trump zong cu a vun cemchih lawlaw.

Media pawl nih hin Trump biachimmi hi a sining lenglei pi tiangin nan laakpiak. A ngaingai tiah cun Trump nih hin a tu le tu ti awk in miphun thleidannak a lakpitu phu (racist groups) pawl hi a doh hna dakaw, tiin Pence nih Media pawl an palhnak langhter buin Harris cu a leh.

Tutan president ai cuhmi hna hi – Trum, 74, Biden, 77 – US tuahbia chung i president an cuhmi vialte lakah a tarbik an si. Cu tikah, kan hruaitu veve hi an kum a upat ko zongah office ah thatein rian an tuan kho ko, timi tehte langhter hi Pence le Harris an rian biapi pakhat ah a cang than cang. Nai i Covid nih Trump a tlunh hna lawngin khan cu biasu cu tlawmte a vun daideuh le si.

Presidential candiates pahnih hna i anmah le an party chung cio ah kechiahnak tha hmuh dingin an i sualsan saling a si. Nov. e election a phichuak hi zeibantuk a va si ko hmanh ah, tutan president ai cuhmi hi US president tuan kho dirhmun ai ngeih veve mi an si ko, tiin ruahmi an si.

National opinion poll ah hin cun Biden nih Trump hi a tei ngai i, a nehhnungbik Reuters/Ipsos nh polls an tuahmi ningah cun buaktlakin 12% points hrawngin Biden nih Trump hi a lonh cang. Florida ah cun Biden nih Trump hi tamial in a lonh ko nain, vote hmuh dingin biataktein an i hmaithlaakmi states (battleground states) pawl belte ah chin cun Trump nih Biden hi poll ah a vun naih deuh ngai cang, ti a si.

Harris hi a tu lio a dirhmun hi Politic rian a tuan chung vialte i a thatbik lio caan a si i, California i US senator a tuan lio mi a si. August ah khan Biden nih a VP tuan dingin a thim. Annih hi mipeng chungkar in ai semmi a si i, hringtu a pa hi Jamaica a si i, hringtu a nu hi India mi a si. Party ngan pakhat nih VP ca i a thimmi vunnak nunau vialte lakah Harris hi a hmasabik a si lawng si lo in, Asian hrinsor lak zongah a hmasabikmi a si.

Pence hi khahlan conservative radio biachimtu a si i, 2016 lio ah khan Democratic vice president tuan dingin an thimmi Tim Kaine hi debate a tuah bal mi zong a si. Anih hi khahlaan US congressman a si pinah, Indiana governor zong a rak si bal. Trump i a buaibai tukmi a cozah uknak tangah fektein a dirkamhtu zong a si.

Catialtu: Chelsea Bawi