Turkey Cozah Nih An Ram Ralkap Bawi 121 Nunchung Thongthlak Ding In Biachah Nak An Tuah Hna

Turkey ram ah 2016 kum lio ah khan rampi nawlngeih nak lak ding in a rak cawlcang mi hna pawl le Turkey president thah ding in a rak cawlcang mi hna chung in an ramchung bochan mi ralkap bawi telh chih in minung 121 cu nunchung thongthlak ding in Turkey biaceih zung sangbik nih cun biachah nak a tuah piak cang hna.

2016 kum lio ah nawlngeih nak lak ding in a rak cawlcang mi hna pawl nih an I timh ning in hlawhtlin nak an hmuh lo hnu in chungtel pawl an tleih mi hna an tamtuk hringhran cang. Cu an tleih mi hna chung ah cun ralkap bawi, biaceih bawi le bochan mi ramhruai tu pawl zong an I tel hna caah rian an phuah mi hna le nunchung thongthlak ding in bia an chah piak cang mi hna hi a thong leng an rak um cang.

Nizan canawn ninga ni (Friday) ah khan Turkey biaceih zung nganbik a si mi Ankara biaceih zung nih minung 121 cu an konglam le an sining felfai tein a zohdih hnu ah Turkey ram phunghram le phunglam kalh in a cawl cang mi an si tiah an fehter hna. Cu minung 121 chung ah cun minung 35 hi nunchung thongtlak ding an ti hna I adang minung 86 hi cu nunchung thongthlak lawng hmanh si loin thongchung ah rianhar tuanchih ding in bia an chah piak hna.

Nunchung thongtlak ding mi ah biachah nak an tuah mi chung I atel ve mi ralkap bawi ngan pakhat zong hi a nunchung lawng hmanh si loin a thih hnu kum 20 tiang a ruhkhua pawl hi thongthlak chih a si lai tiah an fehter.

2016 ah phungning lo ngai in Turkey ram nawlngeih nak lak ding in a rak cawlcang mi hna nih hin President Turkish President Recep Tayyip Erdogan hi thah ding in ramchung ral an rak chuah ter nak ruang ah minung 250 nak tam an rak thah hna.

 146 total views,  1 views today

This function has been disabled for Chin 11 News.