Tuluk nih thil fihnung le huattlai takmi a tuah than hoi

Tuluk nih meitha a kalmi electric thir ramri ah an zam.

Tulio Kawl ralkap hna le KIA hna biatak tein an i kah lio a si. Kachin mipi tampi hna nih inn lo chuahtak in ramlak ah an zam hna.

Kachin ramkulh le Tuluk ramri ahcun Tuluk cozah nih ramri ah thir a zammi ah electric mei a bunh tiah theih a si. Ramri thir cu meitha a kal caah tongh ngam le pah ngam ding zong a si lo.

Cu pinah Tuluk ram ramri lei in Kachin ramkulh lei cu sport light a nganmi in an van ceuh lengmang tiah Kachin mipi hna nih an chim.

KIA upa hna nih Tuluk cozah an chawnh hna i zei ruang ah dah mah bantuk thil hi nan tuah tiah an hal hna. Tuluk cozah nihcun kan ram chung ah Kawl ralkap an rak lut sual lai ti kan phan caah kan tuah mi a si tiah an leh hna.

Kawlram hi ralkap nih uknak a lakmi kong ah Tuluk nih UN ah a dirpi peng. Cu lawng si loin Tuluk nih hriamnam le thiamnak zong a bawmh ti a si. KIA umnak sakhan Alaw Bum kahnak zong ah Kawl ralkap Vanlong cu Tuluk ram chung ah duh chung in luhnak nawl a ngei i Tuluk ram lei ah an kan kah tiah KIA upa hna nih an chim.

Tutan ah Tuluk nih ramri khamnak thir ah meitha a pekmi le zanchiar Sport ligjt in ramri an ceuh i an bih mi hi Kachin mipi khamnak caah a tuah mi a si ko lai tiah an zumh cio.