Tuluk Cu A Cei Bak Ko Cang, US Nih A Tuahto Mi Ruang Ah Mitthli He A Um Ko Cang

US Nih Tuluk counselor An Thawl Hna: US Houston khua ah aummi, US consulate zung cungdot cem I, a thlung cungah Tuluk palai hna nih nizan ah an catlap tampi le hmunthur hlonnak kuang pawl an khangh caah US palik pawl le meithahnak seh nih an va zuan hnawh hna. An khanghmi ca pawl ah US spy an tuahnak kong tampi a um lai tiah an zumh.

Senator Marco Rubio nih tweeter ah a tialmi ahcun, “Huston ah a ummi Tuluk consulate zung hi diplomatic facility zung si loin Tuluk communist party hna nih spy tuahnak center caah an hmanmi zung a si tiah a tial.

President Donald Trump cozah nih suimilam 72 chungah Tuluk counselor pawl cu US in chuah dingah nawl an pek cang hna, an chuah duh lo ahcun tlaih colh dingah order an pek cang hna. President Trump nih “Enough, we’re not going to allow this to continue to happen.” tiah a chim.

US Cozah Nih Tiktok Phih A Timh: US ramdang vuanci Mike Pompeo nih “TikTok a hmangmi US citizen hna nih TikTok chungah an thunmi information le data vialte cu Tuluk communist cozah kut ah a phan kho dihmi a si caah TikTok hi US ah kan phih a hau,” tiah a chim. Mah ti kan tuahmi hi private company caah si loin US citizen himnak caah kan tuah a herhmi a si tiah a chim chap.

US ah TikTok a hmangmi hi US ah 37.2 million an si. Mah chungah minung zeimawzet an data le information cu Tuluk communist cozah kut ah a phan cang lai tiah zumh a si. US bank ngan bik pakhat a simi, Well Fargo Bank ah rian a tuanmi paoh cu company nih TikTok hman lo dingah nawl a chuah cang.

A rauh hlan ah TikTok cu US ah an phih chom lai tiah zumh a si. US cozah nih 5G network a hmangmi Tuluk company Huawei zong US thilri a thlithup in an fir lai a phan ruangah US ah luhnak nawl a phih cang hna. UK cozah nih zong nih Huawei company cu an phih ve.

Catialtu: Salai Lairamthang

 189 total views,  1 views today

This function has been disabled for Chin 11 News.