Pathian lawng nih aruang tak cu a theih. Kei zong covid in ka rak tuar ve. Nichiar thutbu in thlan chuah lo in rian tuanmi hna hi an zual ahma khun i asi hnga maw tiah ka ruah. Nichiar taksa pum cawlcanghnak ngei khomi hi cuap lei ah resistance atha deuh tihi asi. Pathian riantuan le zung ah thutbu riantuantu tampi hi, physical exercises um tuk lo caah covid nih a tei khun deuh ko hna rua.
Cun, takpum cawlcanghnak (physical exercises) a tlawm deuhmi hna sin ah, cholesterol level a sang deuh lengmang lai i, diabetes or prediabetes tbtk um duh ngai asi. Cu pawl a khan a ummi hna sin ah Covid a luh ahcun a zual khun ti kha an chim vui hra kan theih ciomi kha asi.
Ka zawt zual lio ka tuahmi tete hi tihin asi. Kei sizung ka um chung ah ka lungchung ah bia a um pengmi cu cawlcang peng ti kha a rak si. Ka zual ngai bu khin, ka vun i ning deuh i zan ka tha dam deuh caan ah heh tiah ka kut ka thlir ka thlak. Tei ka ma i ka thu, ka ke ka cawi tbtk ka tuah. I hngilh tuk lo dingin keimah le keimah kai sih, kai kheuh (Zan ka ih i ka hnar i ka thaw a cat buk deng lengmang kha kai theih caah asi).
Zing ka khuadei in ti kai hne in litter 1 hrawng ka dawp dih lengmang. Chun ah litter 1 ka dindih rih. Zanlei sang ah litter pakhat, zan ah pakhat ka ding peng. Tisa an ka tonghter lo- Hawhra ciahmi ka ding. (Lai sital in tisa ihut tbtk khi America sibawi te nih tha an pe lo. Tisa tuk in i hut sual ah thluak a rawk khomi asi, tiin an ka chimh).
Ice-water timi Zikhe bak ah ciahmi tikik hi zing in zan tiang an ka dintermi asi. Hawhra hang tam deuh din ah khin, a kih ka thei tuk ti lo. Thazaang pek kan herh: Sibawi nu zingka ah a ka veh ding kai ngaih tuk lengmang. Aruang cu siai a ka pek dingnak in a kaa in ruahchanhnak bia (hope) kha theih ka duh bikmi asi. A thi ding ah ka ruah cang hnu in, doctor nih ruahchannak bia le thazaang bia a ka chimh mi nih ka lung a thawnter, ka dam lai i, cucu ka tuah te lai tbtk ruahchannak a ka pek.
Thazaang peknak bia nih ka ruhkhua tiang a damter ko. Sibawi theng asi hau lo. Covid zawt lio ah hin thazaang peknak hi aherh tuk hringhran ko. Thinlung nih thih bk ding i ruah cun, thih lanh thai hi a fawi tuk ding asi. Ruahchannak hi nunak arak si ve, ti le rawl lawng hi nunnak asi hrim lo.
Covid19 cu tuar sual lo ding i runven kha a thabikmi si cu asi ko. Zawtnak i ton sual zong ah, lungthawn aherh. Adam mi nih thazaang pek aherh hringhran. Kawlram boruak nih le laklawh lio asi. Adam rih mi hna zong, nikhat ah motorcycle rumro kal lo in, ke in lam kal, thlenti i chuahter lengmang, cawlcangh peng hi damnak sitha pakhat asi ko hnga lo maw.. Credit: Salai Biak
Leave a Reply