Ttih An Nung Tuk Ee: Ralhrang Meithal Kahnak In Hngakchia 2 An Nunnak A Liam Ee

Ttih An Nung Tuk Ee: Ralhrang Meithal Kahnak In Hngakchia 2 An Nunnak A Liam Ee

Thaton Ah SAC Ralkap Nih Hriamngan An Kah Ruang Ah Ngakchia Pahnih Nunnak Liam

Mon ramkulh, Thaton peng ah SAC ralkap nih hriamngan an kah ruang ah khuate pakhat ah hriamngan an tla i, ngakchia pahnih an nunnak a liam pin ah pa pakhat hliamhma a pu, tiah tualchung mi hna sin in theih a si.

Nihin March ni 8 zing suimilam 7:00AM hrawng ah Thaton peng Kyiapan Khah Lah Yah 24 in ralkap nih hriamngan an kah i, Kyunming khua ah a tlak caah kum 10 tluk ngakchia pa pakhat le kum 12 tluk ngakchia nu pakhat an nunnak a liam i kum 40 tluk pa pakhat hliamhma fak ngai a pu, tiah theih a si.

Hi kong he pehtlai in, “kahdohnak zeihmanh um loin SAC ralkap nih hriamngan hi kah thlorh in an kah caah hi thil a cannak hi a si” tiah tualchung mi pakhat nih a chim.

Relchap>>>>>Kachin ramkulh, Mohnyin peng Mohnyin Myoma palik sakhan le SAC ralkap sakhan 2 cu kah an ton caah SAC ralkap 2 an thi, tiah Mohnyin PDF in ṭuanvo ngeitu pakhat nih a chim.

March ni 7 zing suimilam 5:00AM hrawng ah SAC ralkap sakhan, Khah Lah Yah 15 le Mohnyin palik sakhan cu KPDF, KIA-PDF hna i bawm in an kah caah ralkap tam tuk hliamhma an pu, sakhan chung ummi ralkap 2 an thi, tiah theih a si.
Cu kahdohnak ah PDF ṭangṭi phu lei in a thimi le aa hliammi kan um lo. Kahdohnak hi zeitik caan paoh ah a chuak khomi a si caah mizapi nih umkal i ralrin le SAC ralkap an umnak pawngkam ah um lo ding in Mohnyin PDF nih ralrin peknak an tuah.

Cu pin ah Mandalay ramṭhen, Taungthar peng Chaungsone khua ah umhmun a khuarmi SAC ralkap cu drone in bomb thlakhnawh an ton caah 2 an thi, tiah Myingyan Battalion 4 Natogyi PDF in ṭuanvo ngeitu pakhat nih a chim.
March ni 6 zanlei suimilam 2:00PM hrawng ah SAC ralkap 35 hrawng nih umhmun an khuarnak cu PDF ṭangṭi phu nih drone in bomb voi 3 an thlak caah 2 an thi i, 2 hliamhma fak ngai an pu, tiah theih a si.

Cu kahdohnak ah Myingyan pengkomh Battalion 4 Natogyi PDF, Myingyan District Drone Strike Team hna i bawm in an kah hna. SAC ralkap nih an kah ve ko hna nain ṭangṭi phu lei in a thimi le hliamhma pumi an um lo, tiah theih a si.