Trump Thil Tuahmi Cu Huat A Tlai Tuk!

Thawnglaknak: CHELSEA BAWI

Trump nih US Democrats pawl he biaruahtinak a Hrawh hnu ah US Mipi Coronavirus Bomh Dingmi Vialte A Hrawh Dih

Coronavirus bomhnak tam taktak pek dingmi kongah Trump nih Congress he khuakhaantinak a ngeihmi a hrawh hnu in cun, Covid-19 lio i vava a tummi Americanmi bomhnak dingah le, US airlines pawl nih layoffs tamtuk an tonmi vun lehthal than dingin ruahchannak an ngeihmi vialte cu minmei bang a tian dih than cang ai.

Election hnu, cun teinak ka hmuh hnu ni le thla kan phaak hlan lo chung paoh cu Congress he khuakhaantinak ngei lo dingin ka Representatives pawl bia a ronh cang hna. Teinak ka hmuh hnu lawnglawng ah rian hmuh ai harhmi Americans le business hmetete pawl i hmaithlaak in bomhnak tor le cheng kan pek te hna lai, tiin sizung in a chuah a thaizing ah Twitter ah a tial.

Kan hnung hrawnghrang vialte ah khan cun, tu kum awtka hrawng i hnamhneh cangmi bomhnak $3 trillion cu a tuan khawh chung tuan ah pek ding Trump nih a duhnak a langhter len bal ko.

A liannganmi kan USA nih bomhnak hmuh a duh, a herh. Tuanti u law cu bomhnak cu a tak in vun tlamtlinter u, tiin ralkap sizung i ai thlop cuahmah lio Saturday ah khan Republican president nih Twitter ah a tial.

Nov. 3 ah khin Trump nih a term hnihnak a tinco khawh le khawh lo US nih biakhiahnak a tuah te lai. National bolls ah hin cun Biden nih Trump hi a hleih ngai ko rih.

Economy thanchoter khawh zau dingin bomhnak thar kongkau an i ceihhmaimi cu Trump nih bultan ngaiin a ceihpi salam hna i, a donghter. Sumpreme Court ah a lawngkaangmi thutdan cung thu dingin Amy Coney Barrett namhnehpiak ding kong lehlam tu cu a rumro lo in a ceihkhaanpi hna. Barret namhnehpiaknak dingah hin cun, biaceihzung ah 6-3 hrawngin anmah Conservative lei nih buan an co ding khi a si.

US ah hin coronavirus in a zawmi hi 7.5 million an um cang i, a thimi hi 210,600 lenglo an si cang. Vawlei cung ram vialte lakah a thimi an tambiknak ram a si.

Bomhnak thar pek ding kongkau zeiah a rel lo tu Senate Majority Leader Mitch McConnell nih cun Trump a karhlannak cu a dirpi. Democrats pawl he lungtlinnak tuahti hi zai a kal lai lo (a teipar a um lai lo). Cuaah, a takin tuah khawh dingmi thil tu hi kan i hmeithlak deuh awk a si, tiin McConnell nih a chim.

Tutan biachahnak hi cu vun let than hram ko, tiin 2016 lio i Hillary nih buan a co nak NY district ah a ummi Rep. Representative John Katko nih Trump sinah nawlnak a tuah.

Minung nunnak a nganfah lio ah hin cun bomhnak kong i biaruahtinak hi kan donghter ngam awk a si lo, tiin Katko nih Twitter in a tial.

Trump a cawlcanghnak hi ai palh taktak khi si, tiin Maine ah re-election ca i harngaiin a cawlcangmi Republican Senator Susan Collins nih a chim.

Nancy Pelosi le Trump cozah karlak i bomhnak pek dingin an i ceihhmaimi chungah hin, rian sunghnak faaktuk in tuar a si cang caah, tu kum hramthok tein an ceihhmai cangmi minung pakhat ah $1,200 cio bomhnak pek ding, an timi hi ai tel. Cun, a ra lai mi thla 6 chungah layoffs a tuah cangmi riantuantu thongsang tampi rian lei ah phurh hna dingin US passenger airlines pawl hi $25 billion bomh ve ding khi an si hnga.

Trump nih bomhnak kong i biaruahtinak a hrawhnak thawngpang a than le cangka, US stocks cu tanglei ah a tla vurmar colh. Airlines i share an tuanmi a ngandeuh pawl zong an tla colh ve.

Tonghmanglo Khuakhannak Lawngte A Si

White House hi tonghmanglo in a um cikcek cang, tiah Pelosi nih a chim. Covid hrik dohnak dingah a dinmi cahsi (steroid) nih hin hlah maw a biachahnak hi a molhter le si hnga, tiin Pelosi nih a chim.

Tu hi, cahsi ka dinmi nih ka khuaruahnak a thatter, tiin ai ruatmi an um ko rua hih, tiin Pelosi nih a chim.

Trump nih biaruah a kan duh lo zong le lawmakers pawl nih bomhnak tamdeuh in kan pek thiamthiam ko lai. Rian sunghmi ruang i bomhnak zong kan tinco te khawh ko lai, tiin Tuesday i online in journalist Jonathan Capehart he biaruahnak an ngeih lio ah Pelosi nih a chim.

Thimnak tuah i Congress pawl a nehhnungbik meeting an thut tikah, asiloah lawmakers pawl nih cozah hman dingmi bomhnak chungin conronavirus bomhnak an pek tikah khin a si te lai dah, tiin Pelosi nih a chimh.

Trump cozah nih a halmi $1.6 trillion le Democrats nih an halmi $2.2 trillion karlak ah lamsialpiak dingin kan hnung zarh chung vialte kha Pelosi le Treasury Secretary Steven Mnuchin cu punghmantein ton biaruahnak an ngei peng.

Bomhnak thar pek dingmi kong khua an khaan khawh lo mi nih hin kan economy chanhchuahnak thazaang a derthawmter chinchin lai i, rammi chungkhar khuasa hna le business pawl hi a herh lo in harnak a pek hna lai, tiah Tuesday zingka ah khan Federal Reserve Chair Jerome Powell nih Business conference ah a chim.

Hi bomhnak tel lo in hin a hrim cu kan i hrim kho ko lai. Asinain, kan i chihkhah ning hi a hnum ngaingai ko lai. Tutan bomhnak kan hmuh lo mi hi cu lung a rawk ko teh aw, tiin Cleveland Federal Reserve Bank Persident Loretta Mester nih CNBC ah a chim.

President le Congress minung pawl thimnak dingah zarh 4 te lawng ai duh cang. Tu tiang i poll an tuahmi vialte zoh tikah, vote petu nih an i hmaithlaakmi tlaangtar hi Covid kong a si. Supreme Court i Ginsburg zaka thimnak kong hi cu Election Day hnu ah tuah ding a si ko, tiin a chimtu hi vote petu lakah tamdeuh an si.

Covid-19 khamnaksi sernak kongah kan hnunglei hrawnghrang kha cu financial markets pawl an tha a tho ngai. Congress hmangin bomh hau a si ngai cangmi US economy pi cu tutan i bomhnak kong ceihkhaang kho lo in an ummi nih a thar in a derthawmter ding khi a fiang ko cang.

Catialtu: Chelsea Bawi