Ton Than Caan Um Seh, Maw ‘Laikhal’ : By Ram Tinthei

Hakha in mawtaw kaa citmi Minivan cu Gankaw lam lei a hung kai thluamah…. vawlei a khu hluaimaimi nih Hakha khualipi cu a hun khuh thluamah ve.. cu lio ah, ka pawng ah a thumi pa ka hun zoh cu; Hakha khualipi cu bye bye tiin a kut a vaih i uai ngai in khua a cuan ka hmuh. Tlawmpal kan hun kal deuh ah a phone aa chuah i, nu pawl an tah thluamahmi video khi thang emem in a phone in a zoh pah in, a mithli dordor in a a tlami cu aa hnawt pah. Ka khuaruah a ka har ter ngai i, ngang ko in ka zoh.

Jean angki leng chah nawn, Ralkap Lukhuh a hringmi, Commando boot kedenh aa denh. Ralkap bag nganpi aa pom pah. A muisam cu kum 40 hrawng asi lai. Pasal taktak muisam a keng nain, a mitthli le a hnapduk he aa ciah ka hmuh tik ah, kaa in kho tilo i bia lam ka hun thawk. “Ka U, khoika lei dah naa thawh?” tiah ka hal. “ Ka nau, Shanram lei ah kir kaa tim, Kawlram Ralkap ka si i, ka umnak lei kir kaa tim” tiin Laiholh pei nawn in a ka leh. “Aw… khoika mi dah na si?” tiin ka hal nolh than. “ Hakha khuami/ Hakha kek bak ka si ko, pawcawmnak ruangah kum 17 ka si in ralkap ah ka lut i, kum 26 chung ka tuan cang. Ralkap ka luh hnu in, Laitlang ka phanh ballo caah Laiholh zong ka philh dih cang. Naite ahkhan, ka nu a damlo an ka ti caah ka hung tlung ta duak. Kanu le kapa cu kum 70 leng veve an rak si cang. An sinah zarh 3 tluk nuam ngaiin ka um hnu ah tuanvo ka ciahnak ka umnak Shanram lei ah ka kir than. Ka kir i ka umnak ka phak bak ah, na nu a zual tuk, rak tlung zokzok an ka ti than caah ka hung tlung. Lampi ka phak ah kanu cu a rak liam diam cang. Hakha ka hun phak cu a ruak hmanh ka tanh manh tilo… tiin a ka chimh pah in a mitthli aa hnawt pah, a khuh pah. “Tunai video ka zohmi kha, kanu an vui lio i an tahnak video asi, hi lawng hi ka tanh manhmi asi. Ka thirual ka hawi le ka kom rual vialte zong, ramdang ah an lan dih cang, a thei hmanh an ka thei ti hnga maw dek” a ka ti.

Ka thawpi ‘phuut’ tiin ka chuah. . Ka zoh i ka zaang a fak tuk. Zeitin tal hnemh awk ka thei lo, ka lu kaa kheuh i, bia ka hun ruah than.

“Atu hi sen 3 (Sergeant) ka si, nupi ka ngei rihlo. Laiholh hi nai ka tlun lawng in ka char than. Krihfa ka si caah, ka kalnak kip ahhin thla cu ka cam zungzal ko. Pathian nih tihnung ral tampi lak ah himnak a ka pek. Pumh bel kaa pumh lonak hi kum sautuk asi cang. Laimi he i hmuhton hi ka duh tuk tawn nain, Laimi ka hmuhmi hnihkhat hi Laiholh an thiam huaha ve ti hoi lo. Laimi he umti hi ka hlam tuk tawn. Atu ka kir hincun chuahnak nawl ka lak lai i, kan ram te ah um ka duh cang ko” tiin a cal domh buin a hun chim.

A ralkap bag nganpi chung in, Sakhi pherh a chuah i thaw ngai in kan ei. Cang-al hang in chuanmi asi caah a thaw khun. Hakha chuak mitsur wine thawl a chuah rih i, kaa khat veve kan din. Ka bag chungin Shark (Ngaman Lipu) kaa chuah ve i dur khat veve kan din. Kan i daw ngaingai.

Tlawmpal kan hun kal deuh i Bungzung khua hrawng kan phan. A riantuannak le a rak umnak pawl tampi a ka chimh. “Kan ram hi dai zokzok seh ti ka duh cang ko. Ralkap hi chuahtak a duhmi kan tampi nain, chuahnak nawl an kan pelo. Kan Laitlang lei tlawn hmanh hi an ka sianh lo caah; kum 26 chung ka chuahpi ka unau le, hringtu kanu le kapa hmanh ka tong kho hna lo” a ti. Atuhi kanu thlan kan sernak in, Laitlang kaltak ka sianlo caah, khunh an ka pekmi zarh 2 ka lonh sual cang. Ka kir in, thong maw an ka thlak te lai, an ka hrem te lai maw?, ka rian dek an ka thumh te lai. Pakhatkhat cu an ka tuah ko lai” tiin lungre thei ngai in a chim. Cu ka lung ah a hungchuakmi cu,“ atu lio Shanram le Kachin ram i, ral tihnung lak ahhin hmai ah kalter than hna sehlaw, a ho theihpitu um loin a nunnak a va liam ko hnga. Kan Lai media pawl nih “ Kawl ralkap pa a thi” tiin awi ngaiin mipi sinah an thlah hnga i, zei theilo in Laimi tampi nih, “Kawl ralkap tham cu va thi ko seh” tiah, kan hei ti chap rih hnga” ti ka ruah ah, kuh in tah khi ka lung ah a chuak. Amah bantuk in kan Lai miphun ralkap pa zeizah ko dah a tlaumi an um hnga, ti ka ruah ah” ka hnarno ruh a ka tam.

Zantim a hung phan i, a video cu a chuah i a zoh than. Mitsur wine cu aa dinh pah, a mitthli aa hnawt pah, sapherh a khai pah. Cu lio ah Keimah zong khua tampi ka ruat ve. Kan ram hi kuanfang fangkhat thlah hau ti loin, daihnak um hram ko seh” tiin sa duh ka that len. Tlangcungmi kan si ah, Kawl ralkap an si ah, ram pakhat fa veve kan si hna i, kan ithah kan i nawn awk asilo. Kawl Lungputkeng Ralbawi cheukhat hna ruangah kan ram ah daihnak a um lo. Zalawnnak a um lo. Hi pawl hi a rannak in tlau viar hna sehlaw, federal uknak hmu zok usih” ti ka duh ning a mak. Zantim suimilam 12 tluk asi ah, Gankaw khua kan hun phan i, kei nih ka tum tak hna. Bia ka cah tak, “Ka upa, na umkalnak ah Bawipa nih in kilveng ko sehlaw. Ni khatkhat ah kan ram ah tonthannak caan um hram seh” tiin kan kut kan itlai i Mandalay lei ah a lan thluamah.

Theihternak: A min le Hakha a umnak sang cu, pumpak hnursuan a lawh lai caah ka hun telh lo.

“ Kan ram ah daihnak um ko seh”.

 508 total views,  1 views today

This function has been disabled for Chin 11 News.