Tihin Maw An Kan HAMH Peng Ko Lai? By Salai Ngun Lal

By Salai Ngun Lal

Tihin Maw An Kan HAMH Peng Ko Lai?

# HAMH timi biafang hi hun hrilhfiah dingah kai harh ngai. Asinain, tahchunhnak he hun langhter ka duh. Lim (Rul) nih ramsa a lemh lai ah khin a HAMH hmasat tawn. A hun Hamh hna bak khin an mit a mui i an khuaruahnak vialte a tlau dih. Cun, a ngerh hna le an ruhrang vialte a nem dih hnu ah a lemh tawn hna.

# Chin miphun cu Tuluk ram in kan ra i zabu 8 hrawngah Chindwin nelrawn kan phan i umhmun kan khuar. Cun, a phunphun ruangah AD 1400 hrawngin Chinram, Manipur, Nagaland le Mizo ram tiang kan phan i umhmun kan khuar tthan. Chinram ahcun Ramuk bawi nih rak uk i mah tein khua ai khanmi le lai ai relmi miphun kan si.

# Kawlram cu Mirang ralkap nih Thibaw Siangpahrang an tlaih i 1885 hnu in zalennak an pek hlan tiang an uk. Sihmanhsehlaw, Chinram tu cu 1896 hnu ceu in Mirang nih an rak kan uk.

# Bochok Aung San nih Mirang sinin luatnak la tti ding in an rak kan sawm i Feb 12, 1947 ah Shan ram Panglong ah kan pale nih lungtlinnak min an rak thai. Bochok Aung San cu July 19, 1947 zinglei 10:37 ah a hawile he an kah hna i mual a lian. Bochok Aung San mual a liam hnu Jan 4, 1948 lawng ah Mirang nih luatnak an kan pek. Cu luatnak an kan pek hnu cun Kawl le tlangcungmi karlak ah i hmuh thiamlonak tete a um caah Jun 8-16, 1961 ah Taunggyi Conference an auh i khua an khang. Cu an khuakhanmi lungtlinnak min an thai hlan March 2, 1962 ah Ne Win nih aana ting.

Cun, Saw Mg nih 1988 ah uknak a laak ve tthan le tlangcungmi vialte cu an kan HAMH dih i Panglong biahren minthainak ah pek ding in rak kamhmi vialte hmu kholo ding le thei kholo dingin an kan tuah. Cu pinah kan Nunphung, Ca, Holh le Biaknak vialte hrawh dih an timh. Cu lawng si loin, Than Shwe nih 2008 phunghrampi in a hun kan ngerh ciammam i kan ruhrang vialte a nem dih i kan cawlcang kho tilo.

# An kan HAMHNAK caan a sau tuk tik ah hin micheu cu an kan HAMH ti awk hmanh kan i thei tilo. An kan lemh thlu lolawng a si cang. Hi HAMHNAK in midang nih an kan chuahpi lailo. U Thein Sein, U Win Myint le Daw Aung San Su Kyi zong nih an kan chuahpi hrimhrimlo hih. Kanmah tein chuahnak lam kawl a herh. Hi HAMHNAK in a kan chuahpi khotu taktak cu kan laihri tan hawi kan ule hi an si. Kan ule nih an kan chuah hnu ahcun kan mit khua a hmu tthan lai i kan lung a fim lai. Cun, kan ruhrang a nemmi vialte an hak tthan lai le kan cawlcang kho lai i kanmah tein khua kan i khan lai le lai kan i rel tthan te lai. Chanhchuah a duh rihlo mi tucu Tihin maw an HAMH peng rih ko ne hna lai?

 145 total views,  2 views today

This function has been disabled for Chin 11 News.