Tidim Hriamtlai PDF Zoland Le CDF -KKG I Bawm In Ralhrang Sakhaan An Phomh I Palek 5 An Thi

CDF, CDF-KKG Le PDF-Zoland I Bawm In Khaikam Palek Sakhan An Kah, Palek 5 An Thi
================
Kalay le Chin ramkulh ramri, Tidem peng Khaikam khua palek sakhan (Komaing Gate) Sept 17, tuzing 5:00Am ah CDF, CDF-KKG le le PDF-Zoland i bawm in an kah i palek 5 an thi tiah PDF-Zoland nih a thanh.

Palek lei hi a thimi lawng si loin hliam a tuarmi zong an um len. Mipi vengtu ralkap lei hliamtuar le a thi an um lo tiah theih a si. Khaikam kahdohnak ruangah Laitlang lei a kai dingmi mawtaw hna cu palek nih an kham hna tiah Khaikam ah a ummi hna nih an chim.

Relchap:CDM Tuah A Duhmi SAC Ralkap, Palek Le Cozah Riantuan Hna Sinah CDF-Hakha Sawmnak Cathanh
===============
Sept 16 ah CDF-Hakha nih CDM tuah a duhmi SAC ralkap, palek le cozah riantuan hna sinah a tanglei bantukin sawmnak cathanh a chuah. Min Aung Hlaing le a kuttang ralbawi hna cu anmah hlawknak caah mipi sin in nawlngeihnak an lak riangmang i sualnak ngei lo mipi cu an tlaih an thah hna i an inn an hrawh piak hna.

Cu bantuk thatlonak hna cu rammi ka si timi lungput ngei in doh dingah mipi lei ah fonh a duhmi SAC ralkap, palek le cozah riantuan hna cu kan in don ko hna; Kan sinah aa fonhmi hna cu laksawng kan in pek hrimhrim hna lai.

1. SAC ralhak, palek le cozah riantuan hna nih CDM an tuah ahcun chungkhar dihlak caah himnak, ti le rawl le ngandamnak lei vialte tuanvo kan in lak hna lai. 2. Meithal le kuan hna nan rak zampi khawh ahcun laksawng ah sing 50 pek nan si lai.  3. Hriamngan le a kuan hna nan rak i zampi khawh ahcun sing 100 pek nan si lai. 4. Mipi ta a simi cozah zung mawtaw hna nan rak I zampi khawh ahcun laksawng ah sing 50 pek nan si lak. Chinland Defense Force – Hakha Pehtlaihnak – +9509764650024, +918731058986