Thlacam A Herh Ko Dah Kaw, CNA Ralkap Le KIA Ralkap Ral A Do Cuahmahmi Caah! An Dirhmun Sining!

Miphun le ram caah nunnak pekin Kawl ralhrang a doh cuahmah mi hna KIA caah fak piin thlacam piak an herh ko. Nang le kei cu zeihmanh fahnak le harsat nak tong lo tein le rawl thawthaw kan ei I zaan mitkuh thaw tein kani hngilh ko lio ah KIA pawl cu zaan it lo le rawl lumsa te hmanh ei kho loin Kawl ralhrang an doh cuahmah ko hna.

Hi KIA ralkap pawl hna hi chungkhar ngei an si ve hna, nu le pa, nupi le fale he khuasa mi an si ve ko hna dahkaw, Kawl ralhrang kuttang ah a miphun umter lai an duhlo caah thih le nun ruat loin ramtang ah harsat nak phun zakip he Kawl ralhrang an doh cuahmah ko hna.

KIA nih an tei hna lo a si ah cun tlangcung mi vialte nih Kawl ralhrang hi a tei kho ti lai lo. Cu caah KIA hi an thazaang tthawnter le dirkamh pi an herh nak zong a si. KIA ralkap nih hi ti hin an chim tawn “zaan mitkuh cim tein kan ih lonak a sau ko cang, rawl lumsa kan ei lonak zong hi a sau ruangmang ko cang mu, chungkhar zunngai in zei tik tiang dah ralram ah kan um rih lai.

Ka miphun le ka ram luatnak dingah si hlah sehlaw hi tluk harsat nak tuar hi cu ka thim hnga lo mu” tiin KIA ralkap hna cu an hrum-ai ve ruangmang ko. Khuasik le nilin zong hrial lo, zaan it lo le raw lei caan hmanh ngei lo mi KIA pawl, Ram caah le miphun caah tiin chun-zaan in thih le nunnak karlak ah Kawl ralhrang a doh cuahmah mi hna KIA caah thlacam nak in bawm ve hna mu. Pathian nih KIA pawl hi umpi zungzal hna sehlaw teinak pe chin lengmang ko hna seh.Credit: Duh Nung Par

(Note: KIA pawl caah thlacamtu nih kan theih chih dingah ka duhmi cu, CNA Ralkap caah zongah cam chih peng uh! Atu KIA Kachin ram ah khin Ral a tu cuahmah mi CNA Ralkap zong tampi an i tel. Kachin ram ah raldoh training a cawngmi an si bantuk in KIA lakah ralhmai suang lengmang an si. Cucaah KIA Le CNA Caah thlacam dai thlang hna hlah u sih)