Thil Khuaruahhar Taktak Mi Thil An Hmuh Cang

Mars chungum Tlang Karlak Tidil Nganpi chungah Ti Tor le Cheng an Hmuh
=======================================================
(CNN nih atial ning tein lehmi asi)
Mars nih hin tlang karlak Tidil Nganpi ai ngeih i, cu kuar nganpi ah cun ti (water) tor le cheng a um lai, tiah scientists pawl nih an chim. Hi thil an hmuhchuahmi hi vawleisen (Mars) a heltu seh hmangin a si, tiah European Space Agency nih an chim.

ExoMars Trance Gas Orbiter seh hi ESA le Roscosmos nih 2016 tein khan an kuatmi a si i, a tu bantukin Mars chungum Valles Marineris ah ti (water) a um kha a va hmuh. Hi tidil hi the Grand Canyon nakin a let 10 in a sau, a let 5 in a thuk, a let 20 in a kau deuh, ti a si.

Cu ti (water) cu tlang kehram ah ai dil i, Mars a heltu seh ah ai bunhmi FREND nih hman a thlak. Hi hmanthlaknak seh nih hin Martian vawlei in pee 3.28 hrawngah a ummi hydrogen hi thatein a hman a thlak khawh.
Mars chungah a ummi tii a tamdeuh hi cu a kihnak lei sangah an um deuh ngawt i, tikhal ah an i cang dih ngawt. Valles Marineris hi Mars i chaklei kap ah a um i, cu ka hmun cu tii khal kho ding lakin a kik lem lo.

Tutan tii an hmuhmi hi May 2018 in Feb. 2021 karlak cung caan lakin an bihzoh mi a si. Cuhlan ah cun, Mars vawlei a cunglei lawngah khin tii a um le um lo an kawl tawn. Cu tikah Mars i leidip tang ah khin tii tlawm te an hmuh pah tawn.


Trace Gas Orbiter hmangin, Mars chung vawleidip in Meter pakhat hrawng thuk tiang khi kan zoh khawh cang. Cucaah, Mars vawlei tangah zeidah a um, ti hi kan hmuh khawh cang. Cuhlan kan hmanmi seh nih a hmuh khawh bal lo mi, tii tor le chengin a umnak hmunhma cu kan vun hmuh khawh cang, tiah FREND ah investigator a si mi Igor Mitrofanov nih a chim.

FREND nih cun Malles Marineris kuar chung i hydrogen tor le cheng a um kha a langhter fawn. Cu kan hmuhmi hydrogen pawl cu tii (water molecules) neh le nang tete si dawh an si i, cuka hmun a cunglei velchum i 40% hi cu tii si dih sehlaw a dawhdang ko.
Hi tidil hi Netherlands ram kauh hrawng a si. A tluangpi in a ummi kuar nganpi lakah ai telmi Candor Chaos tiang a vai peh.
Mars vawlei ah a ummi hydrogen pawl kawlhawl dingin FREND rian a tuan cuahmah.

“Mars a lenglei vawlei ah a hung pawtmi neutorns zoh chom lawngin cun Mars chungah tii zeltuk tam dah a um, timi hi kan chim fiang kho lai lo,” tiah Space Research Institute of The Russian Academy of Sciences i senior scientist Alexey Malakhov nih a chim.
Neutrons pawl an i sernak a ruangah cu, ‘galactic cosmic rays’ tiah theihmi a thawngtukmi vawlei dip tete nih Mars hi a rak den bal caah a si. Valles Marineris a laifang le bang hi cu tii in khat sehlaw a dawh. A rocarmi vawlei nih hin a hnawngmi vawlei nakin neutrons tam a chuah deuh.

Valles Marineris hi kan Vawlei i a hnawngbikmi hmun hei ko khin ai lo. Hika hmun hi a tu le tu a khuati kit a phanh caah, vawleiro tangah hin tilkhal i a zungzal in a um tawn.
Tutan seh thilri kan hmanmi nih hin cuhlan kan hmuh khawh ballo mi ai thupmi tii pawl a kan hmuhter khawh. Hi tii hi tikhal maw a si lai, asiloah vawlei chungah ai erhmi tii dah a si lai, theih lo a si. Scientists pawl zumhning ah cun, tikhal a si in an zumh, zeicahtiah hika hmunah a ummi thil (minerals) nih hin tii an i zawi cio, ti a si.
Thlenglei zawn ah khin cun khuati a linsa deuh ngai. Cucaah, cuka hmun ah cun tii hi an sining tein (khal lo in) an um theu lai, tiah scientists pawl nih an zumh.

Tutan kan hmuhtonmi hi khuaruahhar thil a si. Asinain, kan tawlrel cuahmahmi tii hi zeitindah ai sem ning a si, timi hi thatein kan hlathlat a hau ko rih, tiah Hakan Svedhem nih a chim.
Tutan kan hmuntonmi nih hin Mars vawlei tang tiangin kan TGO seh nih hman a thlak khawh cang, ti a fianter. Thuuktuk tiang cu hman a thla kho lo nain, hmunkaupi tiang huap in cun a thlak khawh.

Hmailei i Mars i mission kan tuah tikah zalong le hnangam deuh tein kan tuah khawh cang lai. Hmailei kum tampi tikah khin cun, minung tiang zong in vung kal khawhnak lam a umter ding thil a si. A hmun ah tii a um ca ko ah hin Mars tlawn hi a si khawhnak ding a lam cu a si.

Mars chung i tor le cheng a rak umbal mi tii vialte cungah zeidah a cang, timi theih khawhnak dingah cun nihin kan hmuhmi tii hi zeitindah ai seem i, khuazeika set ah dah a um, ti theih hi a biapi hringhran. Cun tutan thil kan hmuhchuahmi nih hin Mars hi minung khuasak khawhnak hmunhma, tisik anhnanh tiangin a um balnak hmun a si bal le si bal lo, ti hlathlai khawhnak lam tiang zong a kan bomhchanh khawh lai, tiah Colin Wilson, ESA’s ExoMars Trace Gas
Orbiter project scientist, nih a chim.

2021 ah khin European Rosalind Franklin le Russian Kazachok nih an rover (seh) an thlah te lai i, 2023 ah khin Mars a phan te lai, tiah an zumh. Cu seh nih cun Mars ah a nungmi an rak um bal le um bal lo, theih khawhnak dingah organic thilri tete a vung kawlhawl te lai. Cu seh nih cun cuhlan i tii a rak chuahtertu, tlak in a khatmi lungtum pawl an ummank Oxia Planum hmunhma hi a vung hlathlai fawn lai.By.. Chaelsea Bawi

Be the first to comment

Leave a Reply

Your email address will not be published.


*