Thih-Sii An Dinh Thluahmah Cang Hna Lai

Hydroxychloroquine cu siibawi te nih hmual a ngei lo. Cu pinah mizaw thihlohnak tu a chuahter chinchin tiah an ti. South Korea zong nih an hmang lo. China nih an hman chun i an duh lo. Side Effects a tam tuk, thikai le zumthlum ngei pawl caah ṭih nung tuk hoi an ti i, an hnon.

France pawl nih a hmual fak rih lomi mizaw “mild symtom” tlawmpal cung ah an rak hneksek bal. A ṭha ko, an dam ko tiah Darwin chan lio ah an rak phuan. Nain, cucu a hnu ah an rak ilet ṭhan. Raifanh-sii HXCQ a ṭha lo tiah mainstream media pawl thanhmi cu Vom le a Cenghngia phu nih an rem lo. Cenghngia pawl nih a cuk bakin an cuk hna. Ṭih an nun khawh ning.

An ram i kaakuai-sii vaccine chuah khawhnak dingah ṭuanvo la lubik pa nih “raifanh-sii” cu hmang ti hlah usih. Adang tu hman awk si, a ti hna. A rian in an phuah deih. “Raifanh-sii zeizat remruam kan cawk cang hi na thei lo maw? A dih hlanlo in kan dinh pet hna lai,” tiah Vom siangpahrang nih a tongh. California le New York cu zawtnak azik an phan cang. Zawtnak vaak ti lo dingin kan hreen khawh cang tiah an iti. An nih ram hnih uktu cu siizung an kal, mizaw zong an va zoh hna. Thilri herhbau an va bih. An chambaunak an itheih.

Annih pahnih cu khur chung in duh paoh huuk hmang an si lo. An Vomkhuai belte nih a khur chung cun a huuk hnawh peng rih hna. Lutaw hngal loin, amah chim cia lila amah nih a doh. Georgia pa nih ka on cang lai a timi cu “ka lung tling lo”, mipi nunnak ca fakpi in khua a tawk awk si, a tongh! A thiam thluh ning. Tu lebang, an duh zong duh lo zong ah an raifanh-sii cawk cia a dih hlan lo, a nawl zultu pawl cu an dinh thluahmah cang hna lai.

Catialtu: Salai C Alexander

 201 total views,  1 views today

This function has been disabled for Chin 11 News.