Theihthiamnak A Herh (A Fiang Kho Taktak Si) By: BikBik Thluasut

A fawinak in chim ko ahcun kan chungkhar ah hin chan thum minung khua kan sa. Ka pa chan, kei ka chan le ka fapa chan tiin. Ka pa nih kei hi kum 41 in a ka nau i kei nih ka fapa hi kum 27 in ka nau ve. Chan thum minung kha caan caan khat ah chungkhar pakhat ah khua kan sak tik ah a zeiti hmanh in kan duhnak le kan ruahnak ah aa lo kho lo. Ka pa zoh duh mi video lei kei ka duh mi aa dang tuk, ka fapa duh mi le a dang pi si fawn. Cucu mirang holh van i hlan ahcun Generation Gap a si ko.

Rawl kan ei tik ah kan meh duh mi aa dang cio. Kei nih a thak le a thur ka duh lio ka pa le ka fapa nih an ei kho ve lo. Tihang sa bak mi ka duh lio ah annih nih a dai mi an duh, ka pa nih Lai chuan (Lai rawl) a duh lio ah kei nih chanthar rawl sipian deuh hna ka duh ve. Annih nih buh cet an duh lio ah kei nih buhrum deuh ka duh. Cuti duhnak le orkaa aa dang mi cu cubuai pakhat ah thut ti i rawl ei ti a hau fawn.

Tikah theihthiamnak le zawnruahnak a um lo ahcun video zoh tikah, rawl ei tikah le khuakhanlairel ti tikah a buai zungzal ding kan si ko. Pathian bia nih mi nih ka cung ah tuah hna seh ti na duh bantuk in an cung ah va tuah ve. Nangmah duhnak lawng si loin midang duhnak kha hmuhthiam i zuam tiah a kan cawnpiak. Kan cung ah theihthiamnak ngei hna seh ti duh ahcun kanmah nih theihthiamnak kan ngeih hmasa kha a herh mi a si. Theihthiamnak le zawnruahnak kan ngeih ahcun Generation Gap zong nih a kan buaiter kho lo. Pa le fa, pu le tu
zong kum zeizat hmanh i thlau ko ai kun, rualrem tein khuasak ti khawh a si ko.

Minung hi mah duhnak lawng hmai kan satter tikah kan buai theu tawn. Mah duhnak nih mit a cawtter mi kan um theu tawn. Tikah midang fah lai le ngaihchiat lai kan ruat kho ti lo. Mithah le lainawn tiang kan ngamh tawn. Kan duhnak a tlin lo tikah kanmah nunnak tiang kan i la tawn. Tuchan minung hi General Z ti an si i anmah minung hawi he nakin seh thilri (internet, phone tbk) he hawikomh a duh deuh mi an si.

Nain kan pale cu seh thilri nakin anmah munung hawi he hawikomhnak tuah an duh deuh ve. An ceih huam mi zong aa dang fawn. Asinain minung hi seh thilri nih diriamnak taktak a kan pe kho lo. Tikah a zei le zong kong ah Paul nih Timote sin ah nang cu khualu khuataw khak tein na um lai tiah a cawnpiak bantuk in ralring te le fimhring tein kan um awk a si. Theihthiamnak le dawtnak puan nan i hruk awk a si tiah Kolose cakuat nih a kan cawnpiak. Catialtu: BikBik Thluasut