Thawpang Tha! Kawl Ralhrang Tampi An Thih Chap!

Kachin ramkulh Banmaw peng, Daw Phone Tang Han Kaing lampi ah ralhrang pawl nih KIA nih vawlei tang ah kamhmi bomb an i lamh sual ruangah a hmunah ralkap 5 an thi. Ralkap nih rampi nawlneihnak an lak hnuah kachin ralkap KIA le ralhrang cu fak chinchin in an i kap hna i Kachin ramkulh chungah an i kap peng.

April 8, Zan suimilam 8 hrawngah khan ralhrang pawl cu KIA pawl doh dingin Banmaw peng Daw Phone Yang Han Kaing lam an kal lio ahcun KIA nih rak kamhmi bomb cu an i lam sual ruangah a buak i a hmunah ralhrang minung 5 an thi colh i minung 8 nih hliamhma fak taktak an pu tiah theih a si.

Bomb puah thawng le ralhrang thi zah hi pawngkam khua mi zong nih an theih. Ralhrang lai tam ngai an thih caah an thin a hung tuk i Laiza pawng Lasangbum ah puak kho mi a phunphun le meithal an kah puah thluahmah tiah DVB nih a tarlangh.

Relchih dingmi: Dr.Sasa cu valweicung media minthang asimi CNN nih biahalnak a tuah. CNN biahaltu nih a timi cu, Vawleicung ram dihlak sinah zeidah chim na duhmi a si tiah a ti. Dr.Sasa nih lehnak a tuahmi cu lunghmui kho tak tak. Atimi cu, International Communities nih ralhrang cawlcanghnak hi an ngolter hrim hrim awk asi. Minung tam kan thih hlan le a tlai hlan ah hin vawleicung ram nih hi hi an ngolter awk a si.

China le Russia nih ralhrang cungah voikhatte phone in chon sehlaw hi thahnawnnak military general cawlcanghnak hi a ngol hrim hrim lai. Cubantuk a si komi ah China le Russia nih an tuah duhlo ah cun, hmailei ah anmah he pehtlaihnak a chia cang lai. Nihin ah an thil tuahmi hi Kawlram minung 54 million nih zeitikhmanh ah kan philh piak ti hna lai lo.

Russia le China he kan I pehtlaihnak zong tihnung a si cang lai tiah a chim. Vawleicung ram le communities leaders nih ralkap cawlcanghnak hi a ngolter lo a si ah cun, nihin nakin minung tam deuh nunnak a liam lai. Cuhlan ah kan rak theih ballomi le kan ton ballomi ramchung ral a thol lai I, thahnawnnak a chuak lai.

Nihin ah ralhrang nih an tuahmi hi mithah sawhsawh a si lo, miphun cihmih nak phun asi. Cu caah ningcanglo thahnawnnak a tuahmi hi international communities nih a ngolter awk hrim hrim a si cang. A tlai hlanah rian a tuan awk asi. Cu ti a tuahlo ah cun, ramchung ah ral lian taktak a tho lai I, minung tamtuk nunnak a liam lai tiah Dr.Sasa nih CNN ah a chim.