Thawngṭha Chimtu Saya David Lah Le U Wai Tun (Nawarat) Cu Baiceih An Si Lio Cang

Thawngṭha chimtu Saya David Lah le U Wai Tun (Nawarat) tazacuai mi kongkau he pehtlai in tazacuai tu le tette pawl cu June 8 ah biahalnak tuah thok an si cang. Atu tan ah tazacuai tu U Ye Win Aung nih Saya David Lah nih thawngṭha a rak chimmi audio files pawl cu tette ah pek asi nain hi thawngṭha chim mi pawl cu hlan lio rak chim cia mi pawl an si tiah David Lah lei Lawyer nih a leh ṭhan hna tiah theih asi. U Ye Win Aung cu Mayangone township No.7 sang uktu asi.

Saya David Lah le U Wai Tun (Nawarat) cu Covid-19 zawtnak caan chung cozah nih nawl chuah mi zulhphung an buar i mipi he ton pumhnak an tuah timi ruang in tazacuai an tonnak asi. An mah zong Covid-19 zawtnak an hun ngei ve caah an dam thiang dih hnu lawng ah hi biacheihnak an tuah asi. June 8 tuah mi biaceihnak ah cun U Wai Tun a nau nu hlasakthiam Tracy zong arak ra ve. Cu leng ah miphun kongkau cawlcaang ngai mi Phungki U Pamaukkhah zong arak ra ve.

Tuan deuh biacheihnak ah khan Saya David Lah le U Wai Tun (Nawarat) cu thawnginn leng in biacheih khonak nawl hal piak an si nain biaceihzung nih a cohlan piak hna lo. Hi kong hi Mayagone township biaceihtu bawi U Moe Swe nih a tawlrel lio asi, June 15 ah biaceih ṭhan an si lai. Yangon ramṭhen ah coronavirus asi kho mi mipi tonpumhnak tuah ruang ah Saya David Lah le U Wai Tun (Nawarat) lawng si lo in Saw Kwe War (church pastor) le Saw Grandy zong Natural Disaster Management Law-NDML tang ah tazacuai an si ve. An pali ning tein Insein thawng ah umter an si. Hi NDML, Section 25 in tazacuai mi nih a tambik kum 3 thawng thlak leng ah tangka liam ter kho zong asi.

Cozah nih biaknak lei puai tiah thawng a thanh mi thlacamnak puai cu Yangon, 8 miles um Yangon Brethren Assembly Church hmun inn pakhat ah March 16 in April 7 tiang tuah a rak si. Hi thlacamnak cu Saya David Lah le U Wai Tun (Nawarat) hruainak thawng in tuah mi asi tiah Mayangone Palek Zung sin hmasabik thawngthanhnak ah hmuh asi. Hi thlacamnak puai hrambunh in zawtnak aa chawn mi minung 80 hrawng an si, culak ah Case 86 le Case 110 cu an thi.

Thawngṭha chimtu Saya David Lah cu Myanmar ram chuak Canada ram mi asi. Atu bantuk biaceih a ton mi kongkau he pehtlai in Ministry of Foreign Affairs cu BBC nih Email in thawng hal asi nain Email kan hmuh timi kong lawng leh asi i a dang Saya David Lah he pehtlai in an chim mi aum rih lo tiah theih asi. _

BBC

 225 total views,  2 views today

This function has been disabled for Chin 11 News.