Thawngpang Tha Taktak. Ralkap Motor Bomb Puahnak Ah Ralkap 4 An Thi!

Tamu Ralkap Motor Bomb Puahnak ah Ralkap 4 an Thi; Nizan zanlei sml. 3:30 hrawng ah Tamu khua i, Asia Lampi cung ah a ummi Aungdawmu Pura pawng ah ralkap motor a puak i ralkap 4 an thi, tiah Tamu khuami pakhat nih DVB ah an chim.

Ralkap motor a puah lecangka in Aungdawmu Pura kiangkap cu ralkap nih caan saupi meithal in kahthlorh in an kah. Zaanlei sml. 5:30 hrawng ah ralkap cu an kir tthan. A thimi ralkap pakhat ruak zong Aungdawmu pura kutka pawng ah an kaltak i zaan tiangpi cuticun a um ko, tiah a cunglei Tamu khuami nih a chim. Nihin zinglei zong ah Tamu khua i palik check point pahnih mei an khangh i meithat zung pakhat zong mipi nih an lak. Credit: The Chin Journal

Relchih Ding: Ramkhel cabuai cung biaruahnak ah siseh, ralkap he idonak ah siseh hriamtlai thazaang thawngmi ngeih lo ahcun ahaa ngei lomi cakei bantuk men asi. Atu Kawlram buainak hnu hin cun miphun phun khat nih hriamnam tlai ralkap thazaang thawngmi ngeih lo ahcun miphun sinnak, biaknak dang ( buddist lo) , mipi humhimnak caah tih a nung kho.

Hriamnam tlai ralkap thazaang thawngmi ngeih lo ahcun aho khua, aho peng ,aho pumpak ca hmanh ah thathnemnak le humhimnak a um lai lo. Cucaah Chin hriamnam tlai CNA le tlangcung hriamtlaiphu pawl an biapi chin lengmang te lai ti cu a fiang ngai. Credit: Salai Z T Lian

Victoria Cungah Lawmhnak 1:- Minung hi Pathian nih zalonnak tling a kan pek mi kan si. Zalong tein khua kan ruat kho i bia kan khiak kho. Mi kong zong kan i ceih ngam i way-phan nak (criticism) zong mah le siarem ning hoih in kan tuah ko hna. Fak kan duh mi kan fak hna, thangtthat kan duhmi kan thangtthat hna i thangchiat kan duhmi hna zong kan thangchiat ko hna.

Hi vialte hi zalonnak kan ngeih cio caah a si. Mirang hi an rak fim cingcing ko: “Na zalonnak cu ka hnarpar te ah hin a dong,” timi phungthluk an ngei. Na zalonnak kha midang na hnursuar lo ahcun, mi har na va tongh lem lo ahcun a poinak a um lo tinak a si rua. Kannih Chin miphun hi kan fimnak le hmuhtonmi lei ah kan ngakchia deuh ko rih rua, kan zalonnak hi mi hnar a va thongh lengmang i a poi ngaingai. Winele beerte kan hun rit pah hnu i fb le media ah bia kan chimmi, ca kan ttialmi cheukhat hna hi a ttialtu lila nih a fimhrin ah a rel tthan, a ngaih tthan ahcun a hmai a khaap theng lai lo.

Camp Victoria um UCCF i kan i pumh, Pathian thangtthatnak hla kan sak, le martar hna salam kan peknak kha lawmhnak in hmulthi a ling kho. UCCF nih rualza a kan pumh, mino tampi chunmang thar le raltthatnak tling a pek hna. Kan ruahchannak arfi a cawmchuahtu a si. Covid-19 pulrai hi kan miphun caah a tthatnak lei hraap in hun chim ka duh. Hi pulrai nih a kan tlunh lio ah khan UCCF ahcun kan hruaitu upa dihlak leng chuak kho lo in an um.

Miphun sersiamnak (nation building) le miphun kilvennak (national security) kong kha pumpek in a nun aa thaapmi kan hruaitu hna nih Chin mino tampi a zarh zarh in an kan cawnpiak. A donghnak ah Hakha, Thantlang lei pastorte dihlak zong an kan sawm i kan ceihmai tti hna. Caan har lio ah caan ttha kan hmu, mino 500 tluk a lamkip in an kan timhtuah khawh.

February 1 in ralkap nih aana an lak dih tik ah kha kan mino vialte kha (Hakha, Thantlang, Falam, Mindat, Matupi, le Paletwa, tbt) fimkhur tuk le ralttha tuk in mizapi hmai ah an dir ngam; an fim, an lung aa rual i an ral a ttha fawn, lungthawhnak menmen (emotional) in bia an khiak lo. Kan mino pawl kan uar tuk hna, kan i bochan fawn hna. Maw, UCCF na cungah kan i lawm tuk ee!

Ceihphai na ton cuahmah zong ah a hlan-kan in timhtuahnak na kan ngeih piakmi hi hmual ngei tuk in miphun a kan ven, kan hna na kan ngamh. Minung pakhat taktak hmanh nunnak sungh ttung lo in nan fimnak le raltthatnak in teinak kan hmuhpi hram ko sawh. Pathian naa bochan i hmunlai ah a chiami na si caah khuaawng na pemh ko lai. Ramchung, a bik in ramleng um laitlai kan unau hna nih thlacamnak le chawva an ngeih mi vialte in an kan dirkamh fawn i kan i lawm bak, kan ruahchannak zong a ceu a ttha. Bawipa nih teinak kan pe tuan ko seh. Credit: Lal Pek Lian