Thawngpang Tha Taktak; Chin Ram Ah Kawl Ralhrang Kengruh A Pelh Cikcek Hih!

Chinram ah cozah rianttuan minung 13,300 (92%) nih CDM cawlcangh nak in Kawl ralhrang phu cu an doh hna caah kawl ralhrang pawl an kengruh an khiah cikcek. Voidang ah cozah nih tax a lak tawn mi electric mei man lanwg hmanh in Hakha khuachung ah thlakhat ah phaisa ting thongkhat an rak hmuh tawn.

Atu cu CDM ral a do mi le mipi nih SAC ralhrang sin ah zeihmanh tax an pek duh ti hna lo caah cozah income an nei ti lo. Mah cu tax tampi lak ah Electric bill pakhat te lawng kan vun chimmi asi. Lungrual te in le lungsau te in kan ttang lai. Kan ti khawh nak lam cio in SAC ralhrang kan doh peng hna lai. Pathian thawng in Mipi nih teinak kan co lai. Saduh kan thah lengmang mi Federal Democracy ram kan ser lai. Credit: Salai Bawi Lian Mang

UN Kong: Myanmar Mipi Runvennak a Rianrannak in Tuah ding in Ms Yanghee Lee nih UN a Hal! Pagu khua ah ni khat chung lawng ah minung 80 leng an nunnak a liam hnu ah atulio Myanmar kong ruahnak petu (Special Advisory Council of Myanmar, SAC-M) chungtel Ms. Yanghee Lee nih Myanmar mipi runvennak a ran khawh chung in tuahpiak awk ah UN General Secretary sin ah a hal.

“Myanmar ram ah upadi zulhnak a um ti lo i, ttihphannak nih a chilhmi ram ah aa chuah cang,” tiah nihin ah SAC-M zong nih cathanh an chuah. SAC-M chungtel a si pin ah Myanmar ram nuhrin covo kong ah UN palai zong a simi Ms. Yanghee Lee nih, “Pagu ah a cangmi tuksaphur thil sining hi minung ruahnak hmanh nih a phan kho lo. Zingka tein Myanmar ralkap nih an kah hna i, minung a bubu in an thah hna. An thahmi hna miruak zong ruru hranghrang in ningcang loin an tuahtopiak hna. Cun, mi an thahnak tehte pawl zong hloh an i zuam. An runven hna ding a simi rammipi kha anmah ralkap lila tu nih tuksum in an thah hna,” tiah a chim.

SAC-M chungtel a si veki Chris Sidoti nih, “Myanmar ram cu ttihnung tuahsernak in a khatmi thil sining ah a phan cang. UN General Secretary nih a nawlngeihnak vialte hmang in Myanmar ram ah a cang cuahmahmi thahnawnnak hi a kham a herh cang,” tiah a chim.

UN General Secretary nih amah pumpak hrim in Myanmar ram le Southeast Asia ah a kal ding in le UN Security Council auh tthan i Myanmar rammi hna runvennak ca ah R2P program nunter khawh ding in aa zuam a herh, tiah SAC-M nih nihin ah a chuahmi cathanh ah an langhter chih.

April 9 ah Pagu khua ah Myanmar ralkap nih minung 80 leng an thah hna pin ah minung tampi an umnak theih loin an tlau. Thla 2 fai chung ah Myanmar ralkap nih rammi 700 leng an thah fawn hna. SAC-M chungtel Marzuki Darusman nih, “Myanmar ralkap nih suimilam ttem in mi an thah hna. Hi bantuk tuksum tuahsernak hi ngol zokzok hna seh. An tuahsernak hi anmah lila nih an zun caan a phan hrimhrim ve lai,” tiah a chim. Credit: The Chin Journal