Thawngpang Chia, Kachin Le Shan Ah Lamzawhtu Minung 3 Meithal Kahnak An Thi!

Kachin le Shan ah Lamzawhtu Minung 3 Meithal Kahnak in an Nunnak a Liam! Nihin May 2, Myanmar ram huap lamzawhnak ah khua cheukhat ah SAC ralkap le palik nih meithal in an kah hna i Shan ramkulh ah minung 2 le Kachin ramkulh ah minung pakhat atu tiang ah an nunnak liam.

Shan ramkulh, Thipaw khua lamzawhnak ah SAC ralkap le palik nih meithal in an kah hna i, Muslim tlangval pakhat a nunnak a liam. Cun, Shan ramkulh chung thotho a simi Naungcho khua zong ah meithal in an kah hna i pa pakhat a nunnak a liam, tiah Shan thawngzamhnak nih an langhter.

Kachin ramkulh, Phakanh khua lei panh in lam a zawhmi Lungkhin khua lamzawhtu mibu zong an kah ve hna i minung pakhat a nunnak a liam. A dang pakhat hliamhma a pu. Mandalay, Monywa le Swebo lamzawhtu pawl zong tthenhmal an tong i sianginn sayamate telh i minung tam nawn tlaih an tong.

Yangon ramtthen, Insein lamzawhtu pawl zong SAC ralkap le palik nih an tthenhmal hna i minung 7 hrawng tlaih an tong. Credit: The Chin Journal