CRPH cawlcanghnak, Chin ramkulh Hluttaw Palai Phu (Committee Representing Chin State Hluttaw-CRCH) nih CDF an dirkamh nak le Chin ramkulh chung ah CDF lawng um an duhnak kong cathanh in an langhter.
Committee Representing Chin State Hluttaw (CRCH) timi cu 2020 rampi thimnak ah Chin ramkulh in teinak a hmu mi MP pawl nih dirh mi, CRPH taang ah um mi, Chin ramkulh aiawh tu an si.
Cathanh an chuah mi; (1). February 1, 2021 ah Ralkap nih rampi uknak hramhram in an lak, cu ruang ah ralkap uknak hrawh khawh nak ding, ram le miphun dirkamh nak ding ah tiah Chinland Defense Force (CDF) dirh a si i CDF cu CRCH nih kan dirkamh nak, CDF a dir mi ka lungtlinnak cu cathanh in kan rak langhter cang.
(2). CRCH lei nih NUG Cozah, Defense Ministry lei nih zulh ding le zulhphung an ser mi he pehtlai in felfai tein zulh le dawi kan zuam peng, cu caah Chin ramkulh chung ah hriamtlai phu a kapkip in a dir lonak ding ah le CDF lawng hi Chin ramkulh chung ah a dir thar mi hriamtlai phu an si nak ding, CDF si lomi hriamtlai phu dang a dir ti lo nak ding hi biatak tein kan i zuam peng ve.
(3). CRCH rianttuannak le cawlcanghnak felfai tein hlathlai le dothlat hmasa loin, CDF Head-quater nih cathanh an chuah mi, Norway ram Chin miphun tonnak ah Chin upa pakhat nih ruahdamh in bia a chim mi, Media vialte nih a dik lo ning in ca an tial mi vialte hna hi hmailei ah cu um ti hlah seh, (NLD MPs cheukhat nih PDF dirh an timh timi media catial le Norway ram ah Pu Lian Hmung Sakhong nih a chim mi pawl an leh duhnak si bik dawh asi), hmailei ahcun hi bantuk in a dik lomi thawngpang le bia hna hi len ter ti lo ding in ralrin khawh i zuam cio usih.
(4). CRCH nih cun Chin ramkulh chung ah a um mi, Chin ramkulh in a chuak mi le aa sem mi minung dihlak lungrual nak tu kawl peng kan i zuam rih lai, Chin miphun chung ah thencheu nak le lungrual lonak vialte um lo ding in kan i zuam lai tiah an langhter fawn.
A cung Point (4) kan langhter mi hi a tawinak in kan tial mi asi. Kawlca in kan telh chih ko caah fiang tein rel khawh cio i zuam usih.
Leave a Reply