Thantlang Nawlngeitu Hna Nih Nungak Sui Hlei Tial Ruak An Khammi Kong Ah Ka Lung Um Bia: By Andrew Tum Tling

Malaysia in Kawlram ah cozah nawlpeknak tein tlunter mi a si. Yangon in Hakha tiang zong tluang tein an tlung ko. Khua chung zeimawzat cu Kawlram he Laitlang he an pal lai ti a fiang ko.

October 4,2020 zanlei muilai ah Thantlang an phan i khua chung ah nan lut kho lo. Thang Hrim Sia zuatnak pawng ah vui ding in an ti nain. Pastor te le chungkhar lei nih kan nawl tuk ko hna nain nawlngeitu nih an duh bak lo. A bik in a duh lotu hi Thantlang ohchuh-zihmu le Doctor pa an si. Cuticun zan mui lak a ruak cu ramlak ah vui a si. October 5,2020 tiang ruak lak ding in nawlngeitu kan nawl rih ko hna nain an duh lo tiah chungkhar lei nih an ka chimh.

Minung nih a fak bik kan tuarmi hi thihnak a si. Miphun dang le ramdang ah lu hi phun hi ho hmanh kan duh cio lo. A si khawh ahcun kan ram te ah, kan khua te ah lu phun kan duh cio. Cucu Laimi kan phung le kan kal hmang zong a si. Thih ahhin zeitluk in dah kan i tuar timi cu Laimi vialte nih theih le hmuh dih tawn cio a si.

Man nau, kan far a simi Sui Hlei Tial hi a ruak te tal a chung le nih hmu ve hna seh. Kan ram thlanmual te ah i vui seh timi saduhthahnak he a ruak van kuat a si tikah Thantlang nawlngeitu hna nih a khammi cu a poi bikmi thil a si.

Thantlang nawlngeitu hna le sibawi hna nihhin zeitluk in dah chungkhar lei kan bawmh khawh hna lai, ruak an vui tikah zeitluk in dah an him khawhnak chung in kan bawmh khawh hna lai timi ruat lo le tuah lo in khua chung luh senh lo le ramlak muizan ah ruah an vuiter hna hi thin a lin taktak ko.

Nihin tiang ah Thantlang ah covid – 19 mizaw pakhat an um ti zong kan thei rih lo. Ralrin nak caah phung an siammi khi a si. Kawl lei in a rami quarantine chiah an si ko. Minung kan donghnak nikhua a simi thil ahhin mah tluk tiangtiang cun cozah riantuan nih nawl an ngeih khawh ko hnga ti ka ruat.

Cozah riantuan nawlngeitu hna nih hi tluk lungfak in an khammi le an tuah mi thil ahhin ziah Thantlang khuanu khuapa hna nih ohchuh-zihmu le Doctor pa hi an sik hna hnga lo? Ziah mino zong si ah, party kan si zong ah cozah tuanvo ngeitu hi an sik hna hnga lo tihi ruah lo awk bak a tha lo.

Laimi kan phung le kan zatlang nun hi a dirkamh bak ko a timi party pawl hmurka zong hi a len pah awk si ko ee tiah ka ruah.

Ziah party pawl vial minung 50 leng hmunkhat ah mask lo huaha in an vah peng ko tung. Zulh phung an buar peng ko tung. Dan an tat hna lo, an zohsawh ko hna.

Ziah, kan far / kan nau nu cu kan phung nih a onh lo tiin cuticun an tuah ne hnga.

Laimi kan nunphung hi thlachiat a ruat mi miphun kan si. A bik in a donghnak nikhua ahcun phung le lam tein ai vui miphun kan si.

Thantlang khua um nulepa, mino, party, mipi ai-awh ding ai cuh ding pawl, mipi ai awh hlutraw thu lio mi pawl hna chungkhar, khuami mitthli a hnawh tu ding, a dirpi tu ding, a aukanh tu ding hi an um lo maw ti ka ruat.

Mizoram ahcun sisehlaw cu ohchuh-zihmu le Doctor pa umnak inn kha mino nih lung in kek viar an den cang hna. Mizo kan si lo hme cu kan ti men hnga. Hi ruang ah pei Mizo cu kan tluk fam hna lo cu. Mizoram ahcun siseh an MP a va kal hnga i chungkhar a va hnemh hnga, MP ai cuh ding mi zong a va kal hnga i thazang a va pek hnga, a va hnemh hna nga.

Thantlang ah um ning law ohchuh-zihmu pa cu Motorcycle in ka pah men lai.

Ramkhel pawl, ramrian hi thingkung ca le hmunthur caah tuan a si lo. Ramchung minung caah tuan a si. Minung pakhat te zong ai tel. Minung caah a tuanmi ramkhel pawl nih minung kan ton mi thil kong ah holh ding a si, chim ding a si.

Note: Sui Hlei Tial hi ka chungkhat zong si lo, ka khua zong si lo, ka theih bal mi zong a si lo. Sinain Lai miphun pakhat nih hibantuk thil a ton tik ahhin kan thin a ka khenh tuk.

Catialtu: Andrew Tum Tling