SAC ralkap nih Thantlang khuami pakhat an kah, a thih le nun a fiang lo
September 15 zing Thantlang Market in Sayama Nu Tha te inn kar hrawng ah SAC ralkap nih khuami pakhat meithal in an kah, a thih le nun a fiang rih lo tiah kan theih.
“Motorcycle an kham hna. An toolbox tiang an check. A zaam mi cu an kah len hna. Pakhatpa hi an kah i a rilh caah an kalpi colh. An hliamh ning a dinfah kan hngalhlo bantuk in a thih le nun kan hngal lo,” tiah khuami pakhat nih The Hakha Times ah a chim.
September 14 zaan in Septemner 15 zinglei tiang Thantlang khua ah meithal thawng a dai kho taktak rih lo.THT
Relchap: Tarung khuachuah lei Taloe ah a kal mi ralhrang phu le KIA kar fakngai in kahdohnak a chuak Tanaing-Shinbuaiyan lamthluan Tarung khuachuah ah ralhrang phu hna cu KIA nih bomb in an doh hna hnuah nihin September 15, zinglei suimilam 6:00 hrawng in kaphnih kar fakngai in kahdohnak a chuak tiah theih a si.
“Nizaan Taloe in a ra mi ralhrang phu hna an si. Zinglei suimilam 6:00 luan in kahdohnak an thok i suimilam 8:00 leng tiang ah an i kap cuahmah lio a si rih. A thi mi le a hliam mi kan thei kho rih lo, an i doh cuanah Lio a si caah” tiah khuami pakhat nih a chim.
A luancia ni tlawmpal ah khan Tarung ah a kai ralhrang phu hna cu Lajabuam(လဂ်ားဘြမ္) khua pawng ah KIA nih bomb puah in an doh hna caah ralhrang phu lei in minung 4 an thi tiah theih a si.
Tarung khua lei ah ralhrang phu hna nih minung thazaang an chap, KIA le ralhrang phu kar ah kahdohnak a chuah hi zarhhnih hrawng a si cang.
Kachinwaves;TCP
Leave a Reply